Hrodzienski błohier Miša, jakoha pasadzili za machlarstva z danatami, paśla vyzvaleńnia razam z kachanaj znoŭ źbiraje danaty
Nie paśpieli skončycca i trecija sutki, jak 18‑hadovy błohier Michaił Drahun vyjšaŭ na svabodu, a para ŭžo znoŭ prosić danaty. Hetym razam źbirajuć sabie na viasielle — ale i tut jość chitryki.
Jaŭhienija Tarasienka i Michaił Drahun. Fota ź jaje instahrama
38‑hadovaja błohierka Jaŭhienija Tarasienka raspaviała padpisčykam, što jana ź Michaiłam užo paśpieła źbiehać u ZAHS i padać dakumienty, kab pabracca šlubam.
Kaža, što jany daŭno chacieli raśpisacca, ale nie paśpieli heta zrabić da zatrymańnia (darečy, na toj momant Michaiłu było ŭsiaho 17 hadoŭ): «Čałaviek praviarajecca časam, i naša rasstańnie turmoj zhurtavała nas jašče bolš. Ja čarhovy raz na ŭčorašniaje pytańnie Mišy: «Ty stanieš majoj žonkaj?» — ja skazała: TAK!».
Ale ž Jaŭhienija skardzicca, što hrošaj na śviata ŭ ich niama. Maŭlaŭ, viasielle było ich maraj, adkładać rośpis jany nie źbirajucca: «U nas niama mahčymaści nabyć piarścionki, navat viasielnaj sukienki ŭ mianie niama… Ja ŭžo maŭču pra ścipłaje śviatkavańnie ŭ kole blizkich, jakoje jość bazaj…»
Tamu para zaklikaje pavinšavać ich danatami i pieraličyć hrošy na numar MTS — maŭlaŭ, dabračyncam usio vierniecca bumieranham.
Ale ž nasamreč numar, jaki apublikavała Jaŭhienija, fihuruje ŭ terminovym zbory na lekavańnie Daryny Janušeŭskaj z Hrodna — u maleńkaj dziaŭčynki rak levaha voka.
Što sapraŭdy Michaił dy Jaŭhienija dumajuć rabić ź viasiellem — nieviadoma. Ale ž adna cyrymonija ŭ ich užo była.
Letaś para raspaviadała ŭ svaich instahramach pra nieziamnoje kachańnie — ciapier tyja staronki ci to vydalenyja, ci to zabłakavanyja, ale, jak kažuć, internet usio pamiataje.
Michaił pisaŭ, što ŭpieršyniu pacałavaŭ kachanuju ŭ lipieni 2024 hoda, a roŭna praz hod zrabiŭ prapanovu ruki i serca. Pa jaho słovach, u žniŭni 2025 hoda jany aficyjna stali mužam i žonkaj.
Fota z taho samaha fejkavaha viasiella
Byli i pryhožyja fotazdymki: «žanich» i «niaviesta» byli ŭ biełym, demanstravali piarścionki.
Ale ž, jak vyśvietliłasia, usio heta było pastanoŭkaj. Fejk vykryŭsia paśla zatrymańnia pary — u aficyjnych zvodkach błohieraŭ nazyvali prosta sužycielami.
Čytajcie taksama:
Siłaviki raskazali, jak hrodzienskija błohiery tracili miljon, sabrany nibyta na lačeńnie dziciaci