1 vieraśnia na Homielščynie byŭ zboj u pracy pasažyrskich ciahnikoŭ. Pryčynaj staŭ vybuch u Rasii

1 vieraśnia 2026 hoda ciahnik №302 Minsk — Adler zatrymali ŭ Homieli, a sustrečny №301 Adler — Minsk nakiravali ŭ abychod praz Kryčaŭ, Mahiloŭ i Asipovičy. Pavodle krynic Supolnaści čyhunačnikaŭ Biełarusi, pryčynaj hetaha staŭ čarhovy padryŭ čyhunki ŭ rajonie stancyi Unieča na rasijskaj Branščynie, jakuju časova zakryli dla pryjomu ciahnikoŭ.

Zdymak ilustracyjny

Biełaruskaja čyhunka tady aficyjna paviedamiła tolki pra techničnyja pryčyny zatrymak. Paśla adnaŭleńnia ruchu ciahnik №302 znoŭ nakiravali praz Dobruš i Zakapyćcie — Złynku.

Pry hetym niebiaśpiečnyja hruzy i vajskovyja ešałony ŭžo daŭno pieraaryjentavali na inšyja maršruty. Z 2023 hoda bojeprypasy, a paźniej i častku naftavych hruzaŭ Mazyrskaha NPZ nakiroŭvajuć pieravažna praz Asinaŭku — Krasnoje (učastak Orša — Smalensk), abychodziačy Unieču.

U toj ža čas na čyhuncy praz Unieču, dzie i dahetul chodziać pasažyrskija ciahniki, užo adbyvalisia padryvy i surjoznyja avaryi. U mai 2025 hoda paśla abvału aŭtamabilnaha mosta tut syšoŭ z rejek pasažyrski ciahnik, zahinuli siem čałaviek, 128 byli paranienyja. U mai 2026 hoda atakam padvierhłasia sama stancyja Unieča, dzie zahinuli čyhunačniki.

1 vieraśnia vyšejzhadany ciahnik №301 zdoleŭ abyści Unieču praz Kryčaŭ, Mahiloŭ i Asipovičy, choć heta pryviało da jaho zatrymki bolš čym na čatyry hadziny.

Kamientary da artykuła