«Jažmaci, jažnaradžała»: deputat-vajenkam prajšoŭsia pa žančynach, jakija suprać nadhladaŭ u škołach

Deputat Rusłan Škodzin, jaki aktyŭna viadzie tyktok u davoli chamskaj maniery, u hety raz nakinuŭsia pa maci školnikaŭ.

Deputat, pałkoŭnik, tyktokier Rusłan Škodzin. Fota tut i dalej: jaho instahram

Pałkoŭnik Rusłan Škodzin źjaŭlajecca deputatam Pałaty pradstaŭnikoŭ, jon bałatavaŭsia ad Viciebska.

Ale ž bolš viadomy jon jak tyktokier — na jaho akaŭnt voenkom.pro padpisana 636 tysiač čałaviek. U sacsietki vajskoviec pajšoŭ vosieńniu 2020 hoda.

«Usie my pamiatajem, kolki niehatyŭnaj infarmacyi vylivałasia z dapamohaj roznych placovak. U bolšaści vypadkaŭ jana była fejkavaj abo padavałasia ŭ takim rakursie, što stvarałasia varjackaje ŭjaŭleńnie ab tym, što adbyvajecca ŭ krainie. Mnie ž chaciełasia raskazać praŭdu, pakazać advarotny bok miedala. Spačatku na kanale była tolki surjoznaja infarmacyja», — chvaliŭsia Škodzin BiełTA.

Ciapier ža kantent jaho kanała šmat u čym składajecca z abrazaŭ. Naprykład, niadaŭna Škodzin žartavaŭ pra toje, što ŭ Biełarusi za parušeńnie pravił darožnaha ruchu mohuć «tuz parvać».

U novym roliku deputat vyrašyŭ paździekavacca z baćkoŭ, jakija niezadavoleny navinoj pra toje, što ŭ škołach Biełarusi pačali ładzić nadhlady vučniaŭ.

Aburalisia jak baćki, tak i maci, ale Škodzin vyrašyŭ nakinucca mienavita na žančyn. Vyrazy jon nie vielmi padbiraŭ.

«Taksama realna dzič niejkaja, treš niejki! Dziaciej zaraz u škołach možna nadhladać! Što heta naohuł takoje robicca?! Ciapier jažmaci ŭsioj krainy treba abjadnacca i masava zdymać roliki ŭ tyktok, a lepš leźci na barykady».

Pałkoŭnik pierakonvaje, što dobra ž, kali «va ŭstanoŭlenym paradku abšukajuć niejkaje dzicia». Moža, pašancuje, i adbiaruć enierhietyk, vejp ci navat nožyk!

«Ale nie, našy jažmaci, jažnaradžała pavinny zaraz prajavić siabie, patryndzieć u tyktok. A na biaśpieku dziaciej naplavać! Bo łajki i prahlady — značna važniejšyja. A moža być zvyčajnaja čałaviečaja tupaść».

Rusłan Škodzin

Kamientary da artykuła