Mark Formelle upieršyniu vypuściŭ adzieńnie dla sabak i katoŭ

Biełaruski brend Mark Formelle upieršyniu vypuściŭ adzieńnie dla svojskich žyvioł. U asartymiencie kampanii źjaviłasia śpiecyjalnaja liniejka dla katoŭ i nievialikich sabak, piša vydańnie «Naš portał».

U novuju kalekcyju ŭvajšli ŭcieplenyja tałstoŭki-papony sa ščylnaha trykatažu. Jany pryznačanyja dla taho, kab sahravać žyvioł u prachałodnaje nadvorje. Adzieńnie pradstaŭlenaje ŭ šerym, bežavym, zialonym, ružovym i fijaletavym kolerach. Madeli taksama adroźnivajucca ŭ zaležnaści ad połu žyvioły.

Džempiery ŭpryhožvaje žartoŭny nadpis The main manipulator — «Hałoŭny manipulatar». Tak brend iranična abyhryvaje papularnaje mierkavańnie, što mienavita katy i sabaki niaredka vyrašajuć, jak budzie žyć ich haspadar.

Pry raspracoŭcy adzieńnia, jak adznačajuć u kampanii, uličvali patreby aktyŭnych chatnich hadavancaŭ. Materyjał nie elektryzuje poŭść, nie abmiažoŭvaje ruchaŭ i dazvalaje žyviole svabodna biehać, skakać i hulać. Akramia taho, tkaninu nieskładana myć, što asabliva zručna paśla prahułak u brudnaje abo słotnaje nadvorje.

U Mark Formelle raskazali, što papony vyrablenyja ź miakkaha futara z načosam. Jany pavinny nie tolki sahravać žyvioł, ale i rabić prahułki bolš kamfortnymi.

Košt adnoj takoj tałstoŭki składaje 17,99 rubla. Pamiernaja sietka raźličanaja na žyvioł rostam ad 34 da 46 santymietraŭ. Dla vybaru adpaviednaj madeli rekamiendujuć vymierać daŭžyniu śpiny hadavanca — ad karku da asnovy chvasta.

Novaja vopratka ŭžo pastupiła ŭ prodaž. Nabyć jaje možna ŭ firmovych kramach Mark Formelle pa ŭsioj Biełarusi, a taksama praź internet-kramu brendu.

Kamientary da artykuła