Biełaruska z kartaj palaka vyjšła zamuž za litoŭca i źbirałasia pierajechać da jaho, ale joj zabaranili ŭjezd u Litvu
Pryčynaj stała byłaja praca.
Biełaruska raskazała ŭ sacsietkach, što paśla viasiella joj zabaranili ŭjezd u krainu muža. Dva hady tamu jana vyjšła zamuž za hramadzianina Litvy, ź jakim paznajomiłasia, kali pryjechała ŭ Vilniu da siabroŭki.
Para vyrašyła žyć u Litvie, tym bolš što šlub ź litoŭcam daje dziaŭčynie prava na litoŭski DNŽ. Paśla viasiella dziaŭčyna padała dakumienty na DNŽ.
Ale ž jana nie atrymała doŭhačakany płastyk:
«Zamiest dazvołu ja atrymała admovu. A potym zdaryłasia toje, čaho my ŭvohule nie čakali — litoŭskaja mihracyjnaja słužba pryznała mianie pahrozaj nacyjanalnaj biaśpiecy i zabaraniła mnie ŭjezd u krainu na 2,5 hoda».
U adnym z kamientaroŭ u instahramie biełaruska tłumačyć pryčyny takoha rašeńnia. Pavodle jaje słoŭ, litoŭcy pajšli na taki krok praź jaje častyja pajezdki na radzimu i «pracu ŭ navinavym partale ŭ Biełarusi».
Paśla atrymańnia ad Litvy statusu pahrozy dziaŭčyna nie zdałasia. Jana pajšła sudzicca ź litoŭskaj mihracyjonkaj i vydatkavała na heta kala hoda. Pieršy sud dziaŭčyna prajhrała, ale padała apielacyju i apielacyjny sud vyjhrała. Zahadali pierahledzieć spravu, ale novy sud dziaŭčyna znoŭ prajhrała.
Daviałosia šukać novuju krainu, dzie para mahła b uźjadnacca. Vybrali Polšču.
Paščaściła, što ŭ biełaruski była karta palaka. Dziaŭčyna atrymała jaje 7 hadoŭ tamu. Karta palaka dała mahčymaść padacca na stały pobyt.