Departamient mihracyi Litvy inicyjavaŭ pravierku byłoha ziacia Šejmana paśla žurnalisckaha rasśledavańnia
Departamient mihracyi Litvy źviarnuŭsia ŭ Departamient dziaržaŭnaj biaśpieki z prośbaj acanić, ci nie niasie znachodžańnie ŭ krainie hramadzianina Biełarusi Andreja Šymanoviča pahrozu nacyjanalnaj biaśpiecy. Padstavaj dla hetaha stała sumiesnaje mižnarodnaje rasśledavańnie žurnalistaŭ, u tym liku «Biuro».
Andrej Šymanovič i Volha Šejman na adpačynku. Krynica: Instagram-akaŭnt maci Andreja Šymanoviča
Pradmietam zaniepakojenaści litoŭskich uładaŭ stali fakty pra stvareńnie mabilnych dadatkaŭ, jakija mohuć pieradavać infarmacyju śpiecsłužbam Biełarusi i Rasii. Pakolki Departamient mihracyi nie maje funkcyj kibierbiaśpieki, jon adnačasova źviarnuŭsia ŭ Nacyjanalny centr kibierbiaśpieki i Biuro litoŭskaj kryminalnaj palicyi z prośbaj pravieści ekśpiertyzu i acanić prahramny kod dadatkaŭ na najaŭnaść uraźlivaściaŭ i škodnasnaha funkcyjanału.
Paśla atrymańnia vysnoŭ usich viedamstvaŭ budzie pryniata rašeńnie pra pravavy status Šymanoviča ŭ Litvie.
Chto taki Andrej Šymanovič
Andrej Šymanovič — biełaruski biznesoviec, jaki ŭ 2016 hodzie ažaniŭsia z Volhaj Šejman, dačkoj adnaho z najbližejšych paplečnikaŭ Łukašenki Viktara Šejmana. Jon šmat padarožničaŭ ź siamjoj Šejmana, u tym liku ŭ ramkach biźnies-prajektaŭ u Zimbabve.
Jak vyśvietlili žurnalisty, Šymanovič maje dačynieńnie da šerahu prajektaŭ u śfiery zboru danych i sačeńnia:
mSpy — servis dla schavanaha sačeńnia za telefonami (hieałakacyja, paviedamleńni, zvanki), jaki pieražyŭ niekalki bujnych uciečak danych.
Nicegram, eSIM Plus, InLab, Aivan — prahramy i nadbudovy, raspracavanyja praź źviazanuju sietku kampanij u Biełarusi i Litvie. Dadatki patrabujuć zališnich dazvołaŭ (dostup da kamiery, mikrafona, kantaktaŭ) i pieradajuć telemietryju ŭ rasijskuju sistemu Yandex AppMetrica.
U 2023 hodzie Šymanovič atrymaŭ dazvoł na žycharstva ŭ Litvie jak startapier, a ŭ 2025 hodzie padoŭžyŭ jaho.
Pravierku pry atrymańni DNŽ jon prajšoŭ mierkavana z-za taho, što na toj momant užo raźvioŭsia z Volhaj Šejman, choć svoj biźnies u Vilni zasnoŭvaŭ jašče budučy členam siamji ŭpłyvovaha čynoŭnika biełaruskaha režymu.