Nauru razarvała dypłamatyčnyja adnosiny z Abchazijaj i Paŭdniovaj Asiecijaj

Respublika Nauru spyniła dypłamatyčnyja adnosiny z Abchazijaj i Paŭdniovaj Asiecijaj. Pra heta paviedamili hruzinskija ŚMI sa spasyłkaj na Ministerstva zamiežnych spraŭ Hruzii.

Dziaržaŭny ściah Nauru. Fota: vecteezy.com

U Ministerstvie zamiežnych spraŭ samaabvieščanaj Abchazii zajavili, što rašeńnie Nauru było «vymušanym» i stała vynikam źniešniaha cisku. Abchazski bok śćviardžaje, što paśla pryznańnia niezaležnaści Abchazii Nauru ŭ 2009 hodzie pamiž krainami nibyta raźvivaŭsia palityčny dyjałoh i supracoŭnictva.

U zajavie MZS Abchazii adznačajecca, što adnosiny pamiž dźviuma krainami nibyta sutykalisia z supraćdziejańniem z boku Hruzii i jaje zachodnich partnioraŭ. Pavodle abchazskaha viedamstva, paśla pierachodu sumiesnych prajektaŭ u praktyčnuju śfieru suprać Nauru pačałasia kampanija «źniešniaha cisku», jakaja ŭklučała palityčny i dypłamatyčny ŭpłyŭ, a taksama ekanamičnyja abmiežavańni.

Pavodle infarmacyi Ministerstva zamiežnych spraŭ Hruzii, urad Nauru pryniaŭ rašeńnie ab spynieńni dypłamatyčnych adnosin z Abchazijaj i Paŭdniovaj Asiecijaj 21 lipienia.

Nauru — maleńkaja astraŭnaja dziaržava ŭ Cichim akijanie. U 2009 hodzie jana pryznała niezaležnaść Abchazii i Paŭdniovaj Asiecii, jakija bolšaść krain śvietu razhladajuć jak častki terytoryi Hruzii. Taksama heta zrabili dźvie inšyja padobnyja krainy — Vanuatu i Tuvału, ale jany adklikali svajo pryznańnie jašče raniej. Paśla ž adstupleńnia Nauru ŭ śviecie zastalisia, akramia Rasii, usiaho try dziaržavy, jakija aficyjna pryznajuć maryjanietkavyja ŭtvareńni na Paŭdniovym Kaŭkazie — Vieniesueła, Nikarahua i Siryja. 

Kamientary da artykuła