Na «Biełaruśfilmie» pačali zdymać moładzievy detektyŭ pa tvory Andreja Fiedarenki

Va Usiažskaj siaredniaj škole imia Fiodara Padbiarozki, što ŭ Smalavickim rajonie, startavali zdymki novaha moładzievaha detektyva-trylera režysiora Kiryła Chaleckaha. Film atrymaŭ nazvu «19.91» i stvorany pavodle tvora biełaruskaha piśmieńnika i dramaturha Andreja Fiedarenki «Afhanskaja škatułka», piša BiełTA.

Fota: BiełTA

Karcina raskaža historyju piacikłaśnikaŭ Cimy i Valika, dziaŭčynki-siroty Vary i vieterana vajny ŭ Afhanistanie Barysa. Hieroi apynucca ŭ centry niebiaśpiečnych padziej: im daviadziecca razhadać tajamnicu skarbaŭ Baktryi — histaryčnaj vobłaści ŭ Siaredniaj Azii — i supraćstajać złačyncu, jaki hatovy na ŭsio dziela hrošaj.

Režysior Kirył Chalecki adznačyŭ, što film źjaŭlajecca ekranizacyjaj adnaho z tvoraŭ Andreja Fiedarenki, ale scenar byŭ značna pierapracavany. U vyniku hledačy, jak abiacajuć, atrymajuć dynamičny tryler-detektyŭ, jaki budzie cikavy jak dzieciam, tak i darosłym.

Fota: BiełTA

Nazvu «19.91» stvaralniki vybrali z-za jaje simvaličnaści. Pavodle režysiora, jana achoplivaje ceły histaryčny pieryjad, ale pakidaje peŭnuju zahadku, jakaja raskryjecca tolki ŭ finale filma. Akramia taho, ličby ŭ naźvie majuć vyrazny vizualny efiekt.

Fota: BiełTA

Zdymki buduć praciahvacca z 24 lipienia da kanca kastryčnika. Jany projduć u roznych miescach Biełarusi: u Minsku, Puchavičach, Usiažy, Zasłaŭi, Rakavie, Žodziškach i Bierazinie. Pakolki padziei filma adbyvajucca ŭ 1991 hodzie, stvaralniki asabliva ŭvažliva padbirali miescy zdymkaŭ, interjery i rekvizit, kab pieradać atmaśfieru toj epochi.

Hałoŭnyja roli vykanajuć junyja akciory Eldar Čerkin, Ihar Panas, Aryna Čarnieckaja i Jaŭhienija Lil. U filmie taksama zdymucca biełaruskija artysty Alaksiej Kačan, Siarhiej Pukita, Luboŭ Pukita i Juryj Ćvirko, a taksama rasijskija akciory Siarhiej Ściopin i Andrej Trušyn.

Fota: BiełTA

Dla Eldara Čerkina rola ŭ «19.91» stanie pieršaj hałoŭnaj u maštabnym prajekcie. Jon raskazaŭ, što hraje ŭpartaha chłopčyka, jaki zaŭsiody davodzić spravu da kanca. Heta ŭžo jahonaja 16‑ia rola ŭ kino.

Da ŭdziełu ŭ filmie taksama zaprašali dziaciej praz ahulnarespublikanski kastynh. Režysior prahledzieŭ 6447 zajavak i vybraŭ 306 kandydataŭ. Takim čynam, u kino trapiŭ prykładna kožny dvaccaty ŭdzielnik adboru.

Fota: BiełTA

Hienieralny dyrektar kinastudyi «Biełaruśfilm» Dźmitryj Siamionaŭ adznačyŭ, što vialikaja padrychtoŭčaja rabota była praviedziena jašče da pačatku zdymak. Pavodle jaho słoŭ, kastynh vyklikaŭ vialikuju cikavaść, a zajaŭki pastupali nie tolki ad biełarusaŭ, ale i ad hramadzian inšych krain.

Akcior Juryj Frankoŭ, jaki vykonvaje rolu nastaŭnika pracy, ličyć, što školnaja tematyka zaŭsiody budzie aktualnaj u kino. Jaho hieroj žyvie ŭ staroj sistemie kaštoŭnaściaŭ i nie zaŭsiody razumieje sučasnych dziaciej, što stvaraje kanflikt pamiž pakaleńniami.

Fota: BiełTA

Premjera filma «19.91» zapłanavana praz hod. Stužku možna budzie pahladzieć u dvuch farmatach: jak čatyrochsieryjnuju historyju, dzie kožnaja sieryja budzie doŭžycca kala 44 chvilin, i jak poŭnamietražny film dla pakazu ŭ kinateatrach Biełarusi.

Kamientary da artykuła