Stała viadoma, kaho Zialenski choča pryznačyć ministram abarony. Ale jaho treba jašče zvolnić z vojska

Prezident Ukrainy Uładzimir Zialenski paviedamiŭ, što paśla zaviaršeńnia nieabchodnych jurydyčnych pracedur płanuje ŭnieści ŭ Viarchoŭnuju Radu dla pryznačeńnia na pasadu ministra abarony krainy kandydaturu Jaŭhiena Chmary.

Jaŭhien Chmara

Jaŭhien Chmara — hienierał-major Słužby biaśpieki Ukrainy. Z 2011 hoda jon prachodzić słužbu ŭ Centry śpiecyjalnych apieracyj «A», bolš viadomym jak padraździaleńnie «Alfa». U 2023 hodzie jon uznačaliŭ hetaje śpiecyjalnaje padraździaleńnie.

Paśla pačatku poŭnamaštabnaha rasijskaha ŭvarvańnia va Ukrainu Chmara ŭdzielničaŭ u abaronie Kijeva i bajavych dziejańniach pa vyzvaleńni Kijeŭskaj vobłaści. Paśla hetaha vykonvaŭ bajavyja zadačy na Danieččynie.

Za hady słužby Jaŭhien Chmara byŭ uznaharodžany ordenami Bahdana Chmialnickaha I, II i III stupieniaŭ, ordenam «Za mužnaść» III stupieni, a taksama adznakaj Prezidenta Ukrainy «Kryž bajavych zasłuh».

Pavodle Słužby biaśpieki Ukrainy, padraździaleńnie «Alfa» pad jaho kiraŭnictvam pravodzić śpiecyjalnyja apieracyi jak na linii frontu, tak i ŭ hłybokim tyle praciŭnika.

Pavodle dziejnaha ŭkrainskaha zakanadaŭstva ministr abarony pavinien być cyvilnaj asobaj. Pakolki Jaŭhien Chmara ciapier źjaŭlajecca dziejnym vajskoŭcam, spačatku nieabchodna źmianić jaho słužbovy status. Mienavita heta i majecca na ŭvazie, što pierad uniasieńniem jaho kandydatury na razhlad Viarchoŭnaj Rady Ukrainy patrebna jašče prajści «nieabchodnyja jurydyčnyja pracedury».

Pasada ministra abarony vyzvaliłasia paśla taho, jak učora pra svaju adstaŭku zajaviŭ raniejšy ministr Michaił Fiodaraŭ. Jon prapracavaŭ na svajoj pasadzie tolki paŭhoda, ale za hety čas dobra siabie zarekamiendavaŭ, tamu zamiena ministra abarony ŭ suviazi sa źmienaj usiaho ŭrada vyklikaje va ŭkrainskim hramadstvie najbolšaje nierazumieńnie.

Kamientary da artykuła