Google Play vydaliŭ «VKontaktie» i miesiendžar Max

16 lipienia z kramy mabilnych prahram Google Play źnikli sacyjalnaja sietka «UKantakcie» i rasijski miesiendžar Max, jakija naležać chołdynhu VK. Pry sprobie znajści ich u katałohu servis paviedamlaje, što hetyja prahramy niedastupnyja.

Zdymak ilustracyjny

Adnačasova karystalniki «VKontaktie» pačali atrymlivać paviedamleńni pra pierachod sacyjalnaj sietki na damien vk.ru. U kampanii rastłumačyli heta techničnymi asablivaściami, adznačyŭšy, što damien.ru, pavodle ich słoŭ, zaŭsiody dastupny i pracuje chutčej.

Anałahičnaja situacyja zakranuła i inšyja servisy chołdynhu VK, u tym liku sacyjalnuju sietku «Adnakłaśniki».

U pres-słužbie VK zajavili, što ich prahramy pa-raniejšamu možna ŭstalavać praź inšyja kramy dadatkaŭ dla Android, u tym liku RuStore, Huawei AppGallery, Samsung Galaxy Store i Xiaomi GetApps. Taksama ŭ kampanii paviedamili, što karystalniki Android praciahvajuć atrymlivać apaviaščeńni, a abnaŭleńni prahram pracujuć u zvyčajnym režymie.

U pačatku tydnia Jeŭrapiejski sajuz uvioŭ sankcyi suprać chołdynhu VK. U abhruntavańni rašeńnia adznačałasia, što VK źjaŭlajecca maciarynskaj kampanijaj tavarystva «Kamunikacyjnaja płatforma», jakoje raspracavała rasijski nacyjanalny miesiendžar MAX.

Jašče ŭ kancy červienia prahramy chołdynhu VK stali niedastupnyja dla spampoŭvańnia ŭ App Store dla karystalnikaŭ iPhone. Miesiendžar MAX byŭ vydaleny adtul jašče raniej — u pačatku leta.

U krasaviku VK paviedamlaŭ, što Biełaruś zajmała treciaje miesca pa kolkaści karystalnikaŭ MAX paśla Rasii i Uźbiekistana. Na toj momant u miesiendžary było zarehistravana bolš za 1,3 miljona karystalnikaŭ ź Biełarusi.

Na fonie naviny pra vydaleńnie prahram z Google Play akcyi VK 16 lipienia patańnieli bolš jak na 7 pracentaŭ u paraŭnańni z zakryćciom papiaredniaha handlovaha dnia.

Kamientary da artykuła