Ukraincy zatapili kala Novarasijska rasijski pamiežny karabiel
Vajskova-marskija siły Ukrainy zajavili pra źniščeńnie rasijskaha pamiežnaha vartavoha karabla FSB «Izumrud» kala ŭźbiarežža Novarasijska. Pavodle ŭkrainskaha boku, karabiel byŭ patopleny marskim bieśpiłotnym kompleksam Sargan-3000. Śćviardžajecca, što paśla pramoha traplańnia jon zatanuŭ, a siarod ekipaža jość zahinułyja i paranienyja.
«Izumrud» byŭ spuščany na vadu ŭ 2014 hodzie. Jon mieŭ daŭžyniu 62,5 mietra, vodaźmiaščeńnie da 750 ton, byŭ abstalavany viertalotnaj placoŭkaj i moh raźvivać chutkaść da 27 vuzłoŭ. Pavodle infarmacyi ŭkrainskich vajskoŭcaŭ, hety karabiel udzielničaŭ u incydencie ŭ Kierčanskim pralivie ŭ listapadzie 2018 hoda.
Kamandujučy Siłami bieśpiłotnych sistem Ukrainy Robiert Broŭdzi, viadomy pad pazyŭnym «Madziar», taksama paviedamiŭ, što ŭ chodzie apieracyi ŭ Azoŭskim mory ŭkrainskija padraździaleńni za apošnija dni nanieśli ŭdary pa dziasiatkach rasijskich sudnaŭ, u tym liku tankierach, suchahruzach i buksirach.
Prezident Ukrainy Uładzimir Zialenski raniej zajaviŭ, što Rasija straciła kantrol nad situacyjaj u Azoŭskim i Čornym marach. Pavodle jaho słoŭ, Ukraina paśladoŭna asłablaje mahčymaści rasijskaha fłotu praz udary pa karablach, partovaj infrastruktury i vajskovych abjektach.
Paśla papiarednich udaraŭ Rasija vyvieła bolšuju častku karabloŭ Čarnamorskaha fłotu z anieksavanaha Kryma ŭ Novarasijsk.
Čytajcie taksama:
«Jachtu Pucina» pierahnali ŭ Sievieramorsk. Mahčyma, jaje ratujuć ad ukrainskich bieśpiłotnikaŭ
Va USU zajavili pra źniščeńnie 19 tankieraŭ u Azoŭskim mory. Jany mahli vazić bienzin u Krym
Ukraincy kantralujuć pavietra vakoł Kryma. Za noč źniščana jašče 10 tankieraŭ