U adnosinach byvaje čatyry vidy chłuśni — ale finał adzin i toj ža

Ci praŭda, što ščyraść — padmurak lubych adnosin? Vučonyja Kapienhahienskaha ŭniviersiteta apytali sotni ludziej i pryjšli da vysnovy: niezaležna ad taho, ci chavajecie vy internet-flirt ci prosta chvalicie niasmačnuju viačeru, luby padman zapuskaje pavolnaje hareńnie — pačućcio viny i padazronaści, jakoje ciaham miesiacaŭ rujnuje davier i moža skončycca razryvam. Vychad jość, ale jon niaprosty.

Fota: Peter Cade / GettyImages.com

Daśledčyki z Kapienhahienskaha ŭniviersiteta na čale ź psichołaham Rakiele Madzini apytali 656 darosłych amierykancaŭ pra ich dośvied padmanu ŭ ramantyčnych adnosinach. Vyniki, apublikavanyja ŭ navukovym časopisie Personal Relationships, razburajuć papularny mif pra biaśpiečnaść tak zvanaj «chłuśni na karyść».

Jak vyśvietliłasia, niezaležna ad taho, ci chavaje čałaviek niešta dziela ŭłasnaj vyhady, ci ščyra sprabuje abaranić pačućci partniora, škoda dla adnosin akazvajecca praktyčna adnolkavaj. Dobryja namiery zusim nie kampiensujuć razburalnych nastupstvaŭ, a lubaja niesumlennaść zvyčajna pryvodzić da straty davieru, paharšeńnia kamunikacyi i emacyjnaha addaleńnia pamiž zakachanymi.

Navukoŭcy vydzielili čatyry asnoŭnyja formy niesumlennaści ŭ parach.

• Pieršaja — heta pramaja chłuśnia, jakaja moža być jak surjoznaj (naprykład, admaŭleńnie zdrady, hledziačy ŭ vočy), tak i drobnaj («biełaja chłuśnia», kali partnior prosta chvalić niasmačnuju ježu ci niaŭdały ŭbor).
• Druhaja forma — utrymańnie infarmacyi abo zamoŭčvańnie taho, što partnior dakładna chacieŭ by viedać.
• Treciaja — aktyŭny padman praz pavodziny, kštałtu vydaleńnia paviedamleńniaŭ ci štučnaha stvareńnia «fasadu narmalnaści».
• Narešcie, čaćviortaja forma — heta niaviernaść, pryčym daśledčyki ŭklučajuć siudy nie tolki fizičnyja zdrady, ale i emacyjnyja ramany, a taksama anłajn-aktyŭnaść kštałtu virtualnaha flirtu.

Tematyka chłuśni taksama akazałasia davoli šyrokaj. Aŭtary naličyli vosiem asnoŭnych śfier, uklučajučy finansy, seksualnaść, zdaroŭje, miescaznachodžańnie, emocyi, minułyja ŭčynki i sacyjalnyja suviazi. Hrošy i seks čakana stali adnymi z samych papularnych tem dla ŭtojvańnia.

Naprykład, respandenty pryznavalisia, što chavali svaje sapraŭdnyja dachody, mieli sakretnyja bankaŭskija rachunki abo rehularna imitavali arhazm, bo adčuvali cisk ci prosta nie mieli sił na vyśviatleńnie adnosin. Sustrakałasia i surjoznaja chłuśnia pra zdaroŭje: adzin z udzielnikaŭ schavaŭ ad žonki ciažkaje zachvorvańnie nyrak, bajučysia, što jaje siamja praz heta nie ŭchvalić ich sajuz.

Samaje niečakanaje i niebiaśpiečnaje nastupstva padmanu navukoŭcy nazvali efiektam «pavolnaha hareńnia» (The Slowburn). Navat kali chłuśnia zastałasia nieraskrytaj, adčuvańnie palohki abo vostryja adčuvańni chutka źmianiajucca pačućciom viny, soramu i škadavańnia, jakija nazapašvajucca miesiacami i atručvajuć psichiku čałavieka znutry.

Akramia taho, zapuskajecca zahannaje koła: toj, chto zmaniŭ sam, pačynaje padazravać u padmanie svajho partniora, i jamu davodzicca pastajanna być napahatovie, prydumlajučy ŭsio novyja apraŭdańni. Jak trapna zaŭvažyŭ adzin z udzielnikaŭ apytańnia: «Davier — heta klej, jaki trymaje adnosiny razam», — i kali hety klej pačynaje vysychać praz sakrety, na adnaŭleńnie suviazi mohuć spatrebicca hady.

Niahledziačy na ahulnuju zmročnuju karcinu daśledavańnie pakazvaje, što časam horkaja praŭda paśla chłuśni moža stać punktam rostu i ŭzmacnić adnosiny.

U nievialikaj kolkaści vypadkaŭ vykryćcio padmanu spracoŭvała jak tryhier dla ciažkich, ale nieabchodnych razmoŭ, jakich para staranna paźbiahała raniej. Hety fienomien atrymaŭ nazvu «adnoŭlenaja suviaź», kali balučy kryzis dapamahaŭ zakachanym vyrašyć nazapašanyja prablemy i zrabić ich sajuz jašče bolš tryvałym.

Adnak dla absalutnaj bolšaści par niesumlennaść zastajecca cichim zabojcam, jaki pastupova źniščaje blizkaść, sparadžaje biaskoncyja svarki i, urešcie, pryvodzić da razryvu.

Vychodzić, što adziny sposab budavać mocnyja i zdarovyja adnosiny — pryniać, što lubaja chłuśnia škodnaja i być ščyrymi navat u drobiaziach i prymać toje samaje ad partniora. A heta vielmi niaprosty šlach.

Kamientary da artykuła