«Toje, što jany robiać, heta i adpaviadaje intaresam». Paźniak pachvaliŭ Łukašenku ŭ situacyi z ultymatumam Zialenskaha

Vieteran biełaruskaha ruchu Zianon Paźniak zajaviŭ u kamientary telekanału «Biełsat», što pahrozy prezidenta Ukrainy Uładzimira Zialenskaha samastojna prybrać retranślatary kala miažy ź Biełaruśsiu pamyłkovyja, a ŭłady ŭ Minsku słušna robiać, što nijak na heta nie reahujuć.

Zianon Paźniak u redakcyi «Biełsata». 24 červienia 2026 hoda. Skrynšot: «Biełsat»

Zianon Paźniak upeŭnieny, što Maskva, jakaja namahajecca ŭciahnuć Biełaruś u vajnu, moža vykarystać pahrozy Uładzimira Zialenskaha na svaju karyść:

«Heta dastatkova surjozna, bo faktyčna hetaja zajava, vielmi nieabdumanaja, pamyłkovaja, daje mahčymaść rasiejcam vykarystać heta. I, napeŭna, pra heta buduć havaryć, jak skarystać hetuju zajavu: albo pačakać, pakul ukraincy dojduć da rozumu i sami zrobiać niešta, chacia ja sumniavajusia, tam ludzi razumnyja, nie dumaju, što tak budzie; albo budzie abmiarkoŭvacca pytańnie, što pavinna zrabić Rasieja, jakaja pravakacyja pavinna iści. Łukašenka pavinien heta viedać, ahulnaja palityka ciapier u ich».

Paźniak taksama skazaŭ, što nie źviartać uvahi na pahrozy z Kijeva — samaje słušnaje, što možna zrabić. Heta adpaviadaje nacyjanalnym intaresam Biełarusi, ličyć palityk:

«Toje, što jany robiać, heta i adpaviadaje intaresam: jany prosta nie źviartajuć na heta ŭvahi. Ja dumaju, jany cudoŭna razumiejuć, što heta takoje, i paŭtaraju: jany ŭ Maskvie abmiarkoŭvajuć, jak vykarystać hetuju pamyłku, pamyłku Zialenskaha».

Raniej prezident Ukrainy Uładzimir Zialenski zajaviŭ, što, pa infarmacyi ŭkrainskich vajskoŭcaŭ i raźviedčykaŭ, retranślatary ŭ Biełarusi, jakija dapamahali rasijskim dronam atakavać Ukrainu, pierastali pracavać z 22 červienia. 

Kamientary da artykuła