Piatro Parašenka taksama viarnuŭ Polščy orden Biełaha Arła

Były prezident Ukrainy Piotr Parašenka abviaściŭ pra admovu ad polskaha ordena Biełaha Arła ŭ znak salidarnaści ź dziejnym prezidentam Ukrainy Uładzimiram Zialenskim. Raniej ad hetaj uznaharody admovilisia inšyja dva ŭkrainskija byłyja prezidenty — Leanid Kučma i Viktar Juščanka.

Piatro Parašenka. Fota: AP Photo / Petr David Josek

Piatro Parašenka, arhumientujučy svajo rašeńnie, zajaviŭ, što ŭznaharoda ŭručałasia nie tolki kiraŭnikam dziaržavy, ale i ŭsiamu ŭkrainskamu narodu, a taksama vajskoŭcam, jakija abaraniajuć Ukrainu i Jeŭropu. Pavodle jaho słoŭ, rašeńnie prezidenta Polščy Karala Naŭrockaha pazbavić Zialenskaha ordena było pamyłkovym i niespraviadlivym.

Jon taksama adznačyŭ, što takoje rašeńnie vyhadnaje Kramlu, bo asłablaje adnosiny pamiž Ukrainaj i Polščaj. Pry hetym Parašenka padkreśliŭ, što jahony žest nie nakiravany suprać polskaha naroda.

Kanflikt uźnik paśla taho, jak u mai 2026 hoda Zialenski prysvoiŭ adnamu z padraździaleńniaŭ ukrainskich Sił śpiecyjalnych apieracyj hanarovaje najmieńnie «Hierojaŭ Ukrainskaj paŭstanckaj armii». U Polščy heta vyklikała krytyku praz suviaź UPA z padziejami na Vałyni ŭ 1943—1944 hadach.

Paśla rašeńnia Naŭrockaha ab pazbaŭleńni Zialenskaha ordena Biełaha Arła, jaki toj atrymaŭ ad byłoha prezidenta Polščy Andžeja Dudy, ukrainski lidar viarnuŭ uznaharodu ŭ Polšču. Paśla hetaha anałahičnaje rašeńnie pryniałi Kučma, Juščanka i Parašenka. Viarnuli taksama svaje ŭznaharody ministr zamiežnych spraŭ Ukrainy Andrej Sibiha, kiraŭnik administracyi prezidenta Ukrainy Kiryła Budanaŭ, pasoł Ukrainy ŭ Polščy Vasil Bodnar.

Kamientary da artykuła