Siarhiej Cichanoŭski pierabraŭsia žyć u Łos-Andželes
Były palitviazień Siarhiej Cichanoŭski da pieršaj hadaviny svajho vyzvaleńnia z kałonii ŭ Biełarusi zapisaŭ videazvarot, u jakim siarod inšaha padzialiŭsia apošnimi navinami sa svajho žyćcia.
Siarhiej Cichanoŭski. Skrynšot ź videa
«Siońnia ŭ Łos-Andželesie ja vyvučaju anhlijskuju movu, rychtujusia da pastupleńnia va ŭniviersitet, pišu knihu i zajmajusia tvorčaściu.
Ja taksama ŭdziačny ŭsim, chto padtrymaŭ mianie paśla vyzvaleńnia.
Adaptacyja da žyćcia na voli — heta niaprostaje vyprabavańnie. Kožny novy dzień nahadvaje mnie, nakolki kaštoŭnyja siamja, svaboda i mahčymaść havaryć praŭdu», — napisaŭ Cichanoŭski, jaki raniej, nakolki było viadoma, žyŭ u Majami.
U hetym dopisie jon padziakavaŭ usim amierykanskim čynoŭnikam i dypłamatam, dziakujučy ŭdziełu jakich Cichanoŭski i inšyja palitviaźni apynulisia na voli — Džonu Koŭłu, Krystafieru Śmitu, Kitu Kiełahu i inšym.
«Asablivaja padziaka majoj žoncy Śviatłanie. Uvieś hety čas jana zmahałasia nie tolki za mianie, ale i za Biełaruś, za prava biełarusaŭ žyć u svabodnaj krainie. Ja viedaju, praz što joj daviałosia prajści. Śviatłana, ja lublu ciabie i hanarusia taboj», — adznačyŭ taksama były palitviazień.
Naprykancy dopisu jon źviarnuŭsia da sučasnaj palityčnaj situacyi:
«Palityka dyktatara pryviała da taho, što Biełaruś u hetyja dni znoŭ bałansuje na miažy vajny. Ja malusia za toje, kab hetaha nie adbyłosia».