Što skončycca raniej: vajna ci Pucin? Prahnozy zachodnich analitykaŭ

Bolš za čatyry hady tamu prezident RF Uładzimir Pucin pačynaŭ vajnu suprać Ukrainy z raźlikam na chutkuju pieramohu. Zamiest hetaha Rasija zahruzła ŭ zaciažnym kanflikcie, jaki zabiraje ŭsio bolš ludziej, resursaŭ i času. Na hetym fonie zachodnija analityki ŭsio čaściej zadajucca pytańniem: što zakončycca raniej — sama vajna ci pucinskaja sistema? Reakcyi sabrała Ukrainskaja słužba Bi-bi-si.

Uładzimir Pucin. Fota: AP

Ukraina ŭzmacniaje cisk

Times apisvaje ciapierašniuju kampaniju jak kryvavaje bałota dla rasijskaha vojska.

Pavodle danych rasijskich niezaležnych žurnalistaŭ i zachodniaj raźviedki, straty vojska RF mohuć składać 225‑500 tysiač čałaviek. Pry hetym sam Kreml nie raskryvaje źviestki pra straty.

«Pucin, były aficer KDB, vychavany na historyjach pra vielič savieckaha vojska, vidać, žadaje zapluščvać vočy na takija realii», — adznačaje vydańnie.

Žurnalisty dadajuć, što Pucin demanstruje ŭpeŭnienaść u pieramozie i adkidaje idei kampramisu. Jon admoviŭsia ad prapanovy prezidenta Ukrainy Uładzimira Zialenskaha pravieści asabistuju sustreču dla abmierkavańnia zaviaršeńnia vajny.

Ale vajna ŭsio čaściej prychodzić i na rasijskuju terytoryju — ukrainskija drony atakujuć abjekty ŭ hłybini krainy, a Ukraina pašyraje ŭłasnyja mahčymaści dla dalnabojnych udaraŭ.

Mienavita heta, na dumku Times, stanovicca adnym z novych vyklikaŭ dla Maskvy.

Siarod apošnich prykładaŭ — udary pa abjektach pablizu Sankt-Pieciarburha padčas ekanamičnaha forumu, jaki Kreml tradycyjna vykarystoŭvaje jak demanstracyju stabilnaści. Nad horadam lotali ŭkrainskija bieśpiłotniki, a rasijskaja Nachvardyja sprabavała źbivać ich sa strałkovaj zbroi.

Asablivuju zaniepakojenaść u Maskvy, pavodle acenki vydańnia, vyklikaje źjaŭleńnie va Ukrainy ŭłasnych dalnabojnych rakiet.

Times zhadvaje kryłatuju rakietu FP-5 Flamingo z bajavoj častkaj vahoj kala tony. Uładzimir Zialenski zajaviŭ, što mienavita takija rakiety ŭdaryli pa zavodzie ŭ Čebaksarach, dzie vyrablali važnyja kampanienty dla rasijskich dronaŭ i rakiet.

Analityk Fabijan Hinc zajaviŭ Times, što niekatoryja ekśpierty navat miarkujuć, što Kijeŭ užo moh apiaredzić Rasiju pa kolkaści štomiesiačnych zapuskaŭ dalnabojnych bieśpiłotnikaŭ.

Na technałahičnych pośpiechach Ukrainy akcentuje i CNN. Instytut vyvučeńnia vajny zajaviŭ, što ŭkrainskija siły «apiaredžvajuć u śfiery inavacyj», najpierš u vykarystańni dronaŭ.

Ukrainskija vajskoŭcy pablizu Časavaha Jaru. Mienavita straty na froncie zachodnija ekśpierty nazyvajuć adnym z hałoŭnych vyklikaŭ dla Kramla. Fota: AFP via Getty Image

Zrešty, kazać pra pierałom u vajnie pakul rana. Analityk Mižnarodnaha instytuta stratehičnych daśledavańniaŭ Rubien Ściuart adznačyŭ u kamientary Times, što rasijskija straty sapraŭdy vielmi vialikija, ale jon «nie staŭ by pakul nazyvać heta pavarotnym momantam».

Hrošy jość. Ale «rubli nie vajujuć»

CNN źviartaje ŭvahu na inšuju prablemu Kramla — čałaviečy resurs. Rasija praciahvaje prapanoŭvać vielizarnyja vypłaty za kantraktnuju słužbu: bonusy da 80 tysiač dalaraŭ i śpisańnie daŭhoŭ da 140 tysiač. Tradycyjna, pavodle danych ekśpierta pa rasijskaj ekanomicy Janisa Kluhie, u pieršym kvartale hetaha hoda nabor u vojska skaraciŭsia na 20% u paraŭnańni z 2025 hodam.

Staršy navukovy supracoŭnik Mižnarodnaha instytuta stratehičnych daśledavańniaŭ Najdžeł Hułd-Devis farmuluje prablemu tak: «Rubli nie vajujuć».

Jon nahadvaje, što heta pieršaja vajna ŭ sučasnaj rasijskaj historyi, kali dziaržava faktyčna kuplaje ŭdzieł hramadzian u bajavych dziejańniach, a nie prosta prymušaje ich da hetaha. Na jaho dumku, takaja madel stvaraje ŭsio bolš ekanamičnych i kadravych ciažkaściaŭ.

Hułd-Devis ličyć: nieŭzabavie Kreml moža apynucca pierad vybaram — albo jašče macniej mabilizavać ekanomiku i hramadstva, albo skarektavać svaje vajennyja mety.

Płakat u padmaskoŭnym Daŭhaprudnym abiacaje ad 6 młn rubloŭ za kantraktnuju słužbu — kala 80 tysiač dalaraŭ. Fota: Getty Image

Ci razumieje Pucin realnuju situacyju?

Adno z samych cikavych pytańniaŭ, jakoje padymaje Times, — nakolki sam Pucin uśviedamlaje realnuju situacyju na froncie i ŭnutry krainy.

Michaił Chadarkoŭski, były rasijski aliharch i adzin z najbolš viadomych krytykaŭ Pucina, ličyć, što rasijski prezident atrymlivaje infarmacyju, ale daviaraje tolki vuzkamu kołu nabližanych ludziej. Praz heta, kaža Chadarkoŭski, «jaho ŭjaŭleńnie pra realnaść krychu adroźnivajecca».

Surazmoŭca Times u Maskvie, blizki da Kramla, charaktaryzuje Pucina inakš:

«Jon vielmi ciarplivy. Jon vieryć u pieramohu».

Ahladalnik The Guardian Sajman Tysdał raźvivaje hetuju dumku jašče dalej. Jon piša, što mnohija — ad Uładzimira Zialenskaha da zachodnich vajskovych analitykaŭ — miarkujuć, što Pucin apynuŭsia ŭ składanym stanoviščy.

Ale hałoŭnaje pytańnie ŭ inšym: kali Pucin sapraŭdy prajhraje, ci razumieje jon heta sam?

Aŭtar dumaje, što naŭrad ci. Pavodle jaho słoŭ, Pucin da hetaha času bačyć Rasiju zvyšdziaržavaj i nie zaŭvažaje, jak vajna ŭsio bolš izaluje krainu i ŭzmacniaje jaje zaležnaść ad Kitaja.

Ahladalnik taksama nahadvaje, što rasijski prezident nie karystajecca internetam i šmat u čym spadziajecca na svajo najbližejšaje atačeńnie. A kali daradcy kažuć jamu tolki toje, što jon choča čuć, to pryčyn źmianiać kurs u jaho stanovicca jašče mienš.

Mienavita tamu, miarkuje aŭtar, navat rost strat i prablem naŭrad ci zmusić Pucina spynicca.

Uładzimir Pucin padčas uračystaściej da Dnia Rasii ŭ Kramli. Fota: Vyacheslav Prokofyev / Sputnik / Krmlin/Pool/EPA

Čamu heta jašče nie krach Kramla

Niahledziačy na ŭsie ciažkaści, spadziavańni, što ekanamičny cisk chutka zmusić Pucina zakončyć vajnu, pakul što vyhladajuć sumnieŭnymi, ličać ekśpierty.

U Centry stratehičnych i mižnarodnych daśledavańniaŭ skazali CNN, što Kreml jašče maje resursy, kab kampiensavać prablemy z naboram vajskoŭcaŭ, a abaronnaja pramysłovaść, choć i pracuje amal na miažy mahčymaściaŭ, praciahvaje funkcyjanavać.

U toj ža čas ekanamičnaja cana vajny raście.

«Sioleta my asabliva bačym, jak ekanamičnyja vydatki narešcie zmušajuć Kreml iści na składanyja kampramisy», — adznačyła daśledčyca Centra Maryja Śniehavaja.

Adnak, pavodle jaje słoŭ, rasijskaja ŭłada pakul što adkazvaje na prablemy nie źmienaj kursu, a ŭzmacnieńniem kantrolu.

Padobnaja vysnova pryvodzicca i ŭ Times: rasijskaja ekanomika adaptavałasia da častki sankcyj, elity zastajucca łajalnymi da Kramla, a hramadstva pastupova zvykajecca ź nižejšym uzroŭniem žyćcia.

Dyk što skončycca raniej?

Ahladalnik Guardian Sajman Tysdał nahadvaje: Pucin histaryčna čaściej adkazvaŭ na vykliki eskałacyjaj, a nie adstupleńniem.

Tamu, apynuŭšysia ŭ tupiku, jon moža nie šukać vychadu z vajny, a naadvarot — pasprabavać jaje pašyryć.

Vydańnie cytuje kiraŭnicu MI6 Błejz Mietrevieli, jakaja zajaviła: «Linija frontu — paŭsiul». Pavodle jaje słoŭ, Rasija ŭsio aktyŭniej vykarystoŭvaje dyviersii, kibierataki i inšyja instrumienty cisku za miežami Ukrainy. Heta, na jaje dumku, asablivaść rasijskaha padychodu da mižnarodnych adnosin.

Padobnaje papiaredžańnie hučyć i ŭ Times. Były brytanski vajskovy ataše ŭ Maskvie Džon Forman adznačaje, što Pucin usio jašče maje instrumienty dla dalejšaj eskałacyi:

«Jon na minułym tydni cytavaŭ Stalina. Heta čałaviek, jaki nie źbirajecca źmianiacca i pierakanany, što Rasija jašče maje dastatkova resursaŭ dla dasiahnieńnia jaho metaŭ».

Tamu hałoŭnaje pytańnie zastajecca adkrytym: ci zmusić usio bolš vysokaja cana vajny Kreml šukać vychad z vajny, ci naadvarot — padšturchnie da novaj eskałacyi?

Kamientary da artykuła