Prajekt chutkasnaj čyhunačnaj mahistrali Maskva — Minsk padymajecca ŭ pryjarytetach

Prezident Rasii Uładzimir Pucin padtrymaŭ pačatak papiaredniaj prapracoŭki prajekta vysakachutkasnaj čyhunačnaj mahistrali, jakaja pavinna złučyć Maskvu i Minsk. Hetaje pytańnie abmiarkoŭvałasia padčas dakładu jamu ministra transpartu Rasii Andreja Nikicina.

Fota ilustracyjnaje

Pa słovach kiraŭnika rasijskaha transpartnaha viedamstva, paśla prakładańnia ŭnutryrasijskaha maršrutu Maskva — Nižni Noŭharad — Kazań druhim pa pierśpiektyŭnaści ličycca mižnarodny prajekt Maskva — Minsk. Jon prapanavaŭ raspačać papiaredniuju padrychtoŭku, i Pucin daŭ na heta zhodu.

Aleh Nikicin adznačyŭ, što ŭ 2028—2029 hadach nieabchodna budzie vyznačyć finansavuju madel prajekta i padrychtavać jaho da dalejšaj realizacyi. Dla raboty nad mižnarodnaj častkaj płanujecca pryciahnuć Jeŭrazijski bank raźvićcia.

Uładzimir Pucin taksama zajaviŭ, što nieadnarazova abmiarkoŭvaŭ ideju chutkasnaj čyhunki z Alaksandram Łukašenkam i što biełaruski bok padtrymlivaje hety prajekt, tamu surjoznych administracyjnych pieraškod nie čakajecca.

Na siońnia ŭ Rasii ŭžo budujecca pieršaja vysokachutkasnaja mahistral pamiž Maskvoj i Sankt-Pieciarburham, zapusk jakoj čakajecca ŭ 2028—2029 hadach. Tolki paśla hetaha płanujecca pierachodzić da budaŭnictva nastupnych maršrutaŭ. Raniej kirunak na Minsk nie byŭ hałoŭnym pryjarytetam i znachodziŭsia tolki na čaćviortym miescy ŭ płanach rasijskich čyhunak.

Jašče ŭ krasaviku 2026 hoda ministerstvy transpartu Biełarusi i Rasii paviedamili pra stvareńnie supolnaj pracoŭnaj hrupy, jakaja budzie vyvučać pravavyja, techničnyja i arhanizacyjnyja pytańni realizacyi vysakachutkasnych čyhunačnych złučeńniaŭ pamiž dźviuma krainami.

Kamientary da artykuła