Jak abaranicca ad mošak? Ci dapamahaje vanil?

Z nadychodam viasnovaha ciapła asobnyja rehijony Biełarusi — asabliva vakolicy Buha, Soža i Dniapra — sutykajucca z sapraŭdnym našeściem mošak. Ciopłaje nadvorje i chutkaciečnyja reki stvarajuć idealnyja ŭmovy dla razmnažeńnia hetych nasiakomych. Raskazvajem, jak ad ich abaranicca.

Ilustracyjny malunak, stvorany z dapamohaj štučnaha intelektu.

Pavodle prahnozaŭ śpiecyjalistaŭ, asabliva šmat mošak čakajecca ŭ druhoj pałovie maja i na pačatku červienia ŭ pojmach rek Pabužža, Paleśsia i Padniaproŭja. Najbolš aktyŭnyja jany zvyčajna ŭviečary, paśla daždžoŭ i ŭ ciopłyja vilhotnyja dni. Dla mnohich heta aznačaje sapsavanyja prahułki, rybałku, adpačynak na pryrodzie abo pracu na aharodzie.

Moški, u adroźnieńnie ad kamaroŭ, nie prosta prakołvajuć skuru. Jany vykusvajuć jaje vierchni płast i vypuskajuć ślinu, jakaja źmiaščaje abiazbolvalnyja rečyvy i antykaahulanty (rečyvy, što nie dajuć kryvi zhortvacca). Mienavita tamu ich ukusy časta bolš balučyja, čym kamarynyja, i vyklikajuć mocny śvierb dy acioki.

Jak abaranicca ad nasiakomych?

Najpierš śpiecyjalisty rajać vykarystoŭvać prostyja miechaničnyja srodki abarony. Na pryrodu lepš nadziavać śvietłaje i ščylnaje adzieńnie z doŭhimi rukavami, a štany zapraŭlać u škarpetki abo zakryty abutak, kab nasiakomyja nie mahli dabracca da cieła. Dapamahajuć taksama repielenty dla skury i adzieńnia, a doma i ŭ pałatkach — maskitnyja sietki na voknach i dźviarach. Akramia taho, varta paźbiahać prahułak kala vady i lesu ŭ pryciemkach, kali nasiakomyja najbolš aktyŭnyja.

Dla dačnych učastkaŭ i miescaŭ adpačynku taksama možna vykarystoŭvać śpiecyjalnyja fumihatary abo prafiesijnuju apracoŭku terytoryi.

Ci sapraŭdy dapamahaje vanilin?

Mnohija biełarusy tradycyjna karystajucca narodnymi srodkami, samy viadomy ź jakich — vanilin. Ličycca, što jaho rezki pach adpužvaje mienavita mošak.

Važna: Suprać kamaroŭ vanilin praktyčna nie efiektyŭny. Taksama nielha błytać zvyčajny vanilin z vanilnym cukram: cukar, naadvarot, pryciahvaje nasiakomych.

Najbolš papularnyja sposaby pryhatavańnia:

vanilny sprej: pakiecik vanilinu razvodziać u šklancy ciopłaj vady, paśla čaho rastvor pieralivajuć u pulvieryzatar. Niekatoryja dadajuć dla ŭzmacnieńnia efiektu hvaździk. Hety srodak raspylajuć na skuru i adzieńnie;

vanilny krem: pakiecik vanilinu źmiešvajuć z 50 mł dziciačaha abo luboha inšaha tłustaha kremu dla cieła. Atrymanuju sumieś nanosiać na adkrytyja ŭčastki skury. Dla lepšaha efiektu časam dadajuć efirnyja alei łavandy, jadłoŭcu abo harbatnaha (čajnaha) dreva.

Zaŭvažym, što surjoznych navukovych dokazaŭ vysokaj efiektyŭnaści vanilinu niama. Jon moža časova źnizić kolkaść atak mošak, ale pa sile i praciahłaści dziejańnia značna sastupaje sučasnym aptečnym repielentam. U miescach vialikaj kancentracyi nasiakomych lepš spadziavacca na prafiesijnyja srodki.

Što rabić paśla ŭkusu?

Kali moški vas usio ž pakusali, miescy ŭkusu varta pramyć čystaj vadoj z myłam. Pry mocnym śvierbie moža dapamahčy chałodny kampres. Taksama možna vykarystoŭvać hieli abo śpiecyjalnyja «balzamy paśla ŭkusaŭ», kali jany jość u chatniaj aptečcy.

Kali paśla ŭkusu źjaŭlajecca mocny aciok, dychavica abo inšyja prykmiety alerhičnaj reakcyi, treba źviarnucca da doktara.

Kamientary da artykuła