Na «Jeŭrabačańni» adnoj z udzielnic nasupierak praviłam dazvolili hrać na žyvym instrumiencie

Jeŭrapiejski viaščalny sajuz (EBU) adstupiŭ ad zvyčajnych pravił konkursu i dazvoliŭ pradstaŭnicy Finlandyi Lindzie Łampienijus vykonvać partyju na skrypcy ŭžyvuju padčas vystupu. Zvyčajna na «Jeŭrabačańni» žyvyja instrumienty na scenie zabaronienyja, bo heta ŭskładniaje techničnuju arhanizacyju šou i chutkuju źmienu numaroŭ, paviedamlaje Yle.

Linda Łampienijus sa skrypkaj. Fota: Ch/Eurovision News

Linda Łampienijus vystupaje razam sa śpievakom Picie Parkanienam ź pieśniaj Liekinheitin («Ahniamiot»). Pavodle ahulnych pravił, vakał pavinien być žyvym, ale instrumientalnyja partyi zvyčajna iduć u zapisie, a artysty tolki imitujuć ihru.

EBU tłumačyć, što zabarona na žyvyja instrumienty źviazanaja z tym, što scenu treba chutka pierabudoŭvać pamiž vystupami.

Adnak hetym razam paśla repietycyj arhanizatary ŭbačyli, što finski numar možna vykanać biez techničnych prablem, tamu dazvolili i žyvoje vykanańnie skrypki. Kančatkovaje rašeńnie pryniali paśla druhoj repietycyi.

EBU taksama adznačyła, što takija vyklučeńni mahčymyja, kali jany abhruntavanyja mastackaj zadumaj i nie parušajuć chod šou.

Jubilejnaje, 70‑ie «Jeŭrabačańnie» sioleta projdzie ŭ Vienie. Paŭfinały zapłanavanyja na 12 i 14 maja, finał — na 16 maja 2026 hoda. U konkursie voźmuć udzieł 35 krain, ź jakich 30 buduć zmahacca ŭ paŭfinałach. Finski duet vystupić u pieršym paŭfinale 12 maja.

Kamientary da artykuła