Vyzvaleny palitviazień Mikita Jemialjanaŭ, jakoha aryštavali jašče ŭ 2019 hodzie, 19‑hadovym

Anarchistu Mikitu Jemialjanavu raz za razam praciahvali termin.

Mikita Jemialjanaŭ: archiŭnaje fota 2019 hoda

Ciapier 26‑hadovy Mikita Jemialjanaŭ — biełaruski aktyvist anarchisckaha ruchu, jaki byŭ zatrymany 20 kastryčnika 2019 hoda paśla taho, jak razam ź inšym anarchistam, Ivanam Komaram, kinuŭ «kaktejl Mołatava» ŭ SIZA na Vaładarcy. Jaho abvinavacili pa niekalkich artykułach Kryminalnaha kodeksa, u tym liku za paškodžańnie majomaści, apahańvańnie budynkaŭ i niezakonnyja dziejańni sa zbrojaj.

U vyniku sud 12 lutaha 2020 hoda pryznačyŭ jamu pakarańnie ŭ vyhladzie 7 hadoŭ kałonii ŭzmocnienaha režymu. Paśla apielacyi termin skaracili da 4‑ch hadoŭ.

Mikita Jemialjanaŭ u sudzie, 2020 hod

Paźniej umovy ŭtrymańnia palitviaźnia značna pahoršylisia: u 2021 hodzie jaho pieraviali na turemny režym i etapavali ŭ mahiloŭskuju turmu №4. Tam jon nieadnarazova padviarhaŭsia dyscyplinarnym pakarańniam — jaho časta źmiaščali ŭ štrafny izalatar (ŠIZA) na praciahłyja terminy.

Padstavaj dla pakarańniaŭ časta nazyvali parušeńni ŭnutranych praviłaŭ, naprykład, admova prybirać terytoryju abo inšyja drobnyja parušeńni. Sam Jemialjanaŭ śćviardžaŭ, što niekatoryja patrabavańni byli niespraviadlivymi. U znak pratestu jon niekalki razoŭ trymaŭ haładoŭki, u tym liku praciahłuju suchuju haładoŭku.

U turmie jaho abmiažoŭvali ŭ kantaktach z rodnymi: nie pieradavali listy, kanfiskoŭvali pieradačy, nie davali spatkańniaŭ. Taksama paviedamlałasia, što jamu nie pieradavali navat malunki ad małodšaha brata. Akramia taho, administracyja admaŭlałasia prymać jaho skarhi.

U kancy 2021 hoda suprać Jemialjanava zaviali novuju kryminalnuju spravu za «złosnaje niepadparadkavańnie administracyi». 9 sakavika 2022 hodzie sud dadaŭ jašče adzin termin źniavoleńnia — 2 hady, a pa sukupnaści pakarańniaŭ — 3,5 hady źniavoleńnia strohaha režymu.

U nastupnyja hady Jemialjanaŭ praciahvaŭ adbyvać pakarańnie, pry hetym rehularna traplaŭ u ŠIZA i inšyja izalatary. U ahulnaj składanaści jon pravioŭ u karcary bolš za piać miesiacaŭ.

Paźniej jaho pieravodzili pamiž roznymi ŭstanovami, u tym liku ŭ kałoniju ŭ Vaŭkavysku i turmu ŭ Hrodnie. U studzieni 2025 hoda jaho znoŭ asudzili pa tym ža artykule za niepadparadkavańnie, i termin źniavoleńnia pavialičyli — chłopiec atrymaŭ jašče dadatkovy hod.

Za čas znachodžańnia ŭ źniavoleńni ŭ Mikity Jemialjanava pahoršyłasia zdaroŭje: jon pačaŭ stračvać zrok, a taksama nie atrymlivaŭ nieabchodnych miedycynskich srodkaŭ i vitaminaŭ. Pavodle infarmacyi, apošnija hady ŭtrymańnia byli asabliva ciažkimi z-za strohich umoŭ i izalacyi.

2 maja 2026 hoda Mikita Jemialjanaŭ byŭ daterminova vyzvaleny. Abstaviny vyzvaleńnia pakul nieviadomyja.

Mikita Jemialjanaŭ paśla vyzvaleńnia. Fota: Dissident.by

Kamientary da artykuła