«Ja — nie hvałtaŭnik». Tramp prakamientavaŭ abvinavačvańni z manifiesta strałka
Prezident ZŠA Donald Tramp adkazaŭ na abvinavačvańni, vykładzienyja ŭ manifieście strałka, jaki sprabavaŭ zrabić zamach na vyšejšych asob ZŠA padčas viačery Asacyjacyi karespandentaŭ Biełaha doma.
Donald Tramp. Fota: AP Photo / Jose Luis Magana
U efiry prahramy «60 minutes» telekanała CBS News Tramp zajaviŭ: «Mianie źviazali z rečami, jakija nie majuć da mianie nijakaha dačynieńnia. Mianie całkam apraŭdali». Kamientujučy tekst napadnika, dzie prezident ZŠA nazyvaŭsia «piedafiłam, hvałtaŭnikom i zdradnikam», Tramp padkreśliŭ: «Tak, jon heta napisaŭ. Ale ja — nie hvałtaŭnik. Ja nikoha nie hvałtavaŭ. Ja čytaŭ hety manifiest. Jon chvory čałaviek».
Zdareńnie adbyłosia viečaram 25 krasavika ŭ Vašynhtonie. Padčas uračystaha mierapryjemstva prahučali streły, što vymusiła śpiecsłužby terminova evakujavać Donalda, Miełaniju Tramp i inšych vyšejšych asob ZŠA.
Pavodle infarmacyi pravaachoŭnikaŭ, napadnikam akazaŭsia 31‑hadovy nastaŭnik z Kalifornii Koŭł Tomas Alen. Pres-sakratar Biełaha doma Kerałajn Levit raspaviała, što jaho cellu byŭ mienavita prezident Tramp i členy jaho administracyi.
Sam ža Tramp u kamientary CBS News dadaŭ, što takoj trahiedyi nikoli b nie zdaryłasia, kali b na terytoryi Biełaha doma byŭ pabudavany «vialiki i abaronieny balny zał».