U mahiloŭskim kaściole źjavicca kaštoŭny abraz

Uračystaje ŭniasieńnie abraza śviatoha Mikałaja i jaho relikvij u kafiedralny kaścioł Mahilova anansavaŭ na svajoj staroncy biskup Alaksandr Jašeŭski. Padrabiaznaściaŭ u abviestcy nie było, ale vydańnie Katolik.life zaŭvažyła, što ikona, jakaja źjavicca ŭ mahiloŭskim kaściole, — z toj samaj sieryi 12‑ci kaštoŭnych «abrazoŭ-siaścior» Mikałaja Kuźmiča, pra jakija paviedamlałasia raniej.

Hety ž abraz śviatoha Mikałaja aśviačaŭ kardynał Kłaŭdya Hudžeroci padčas svajho pryjezdu ŭ Pinsk. Ikony vyrablaje razam z synam viadomy majstar-juvielir — zasłužany dziejač mastactvaŭ Biełarusi Mikałaj Kuźmič, jaki ŭznaviŭ znakamity kryž Jeŭfrasińni Połackaj.

Praces stvareńnia kožnaha abraza — u siarednim 6‑8 miesiacaŭ. Jany vyrablajucca z vykarystańniem techniki pieraharodkavaj emali, uklučajučy techniku staražytnavizantyjskaj emali, jak pakazvaŭ sam majstra. Asnoŭnymi materyjałami abrazoŭ źjaŭlajucca zołata, srebra, kaštoŭnyja i napaŭkaštoŭnyja kamiani.

Uličvajučy košt takoha abraza, biez dapamohi miecenataŭ naŭrad ci jon moh by źjavicca ŭ niebahataj parafii. Raniej ikony z hetaj ža sieryi byli pieradadzienyja nievialikim kaściołam u Ružanach, Pružanach i inšych miescach.

Pra pachodžańnie relikvij śviatoha Mikałaja, jakija źjaviacca ŭ Mahilovie, paviedamlajecca, što jany dastaŭlenyja z horada Bary ŭ Italii, dzie zachoŭvajucca moščy śviatoha. Vierniki majuć nadzieju, što sapraŭdnaść relikvij paćvierdžanaja dakumientami i ich nieabchodnuju vieryfikacyju praviali śpiecyjalisty ŭ hetaj śfiery, kab paźbiehnuć mahčymych falsifikacyj — z ulikam papiaredniaj dziejnaści niekatorych miecenataŭ.

Kamientary da artykuła