Tramp na sustrečy z Rute pastavić pytańnie pra vychad ZŠA z NATA
Prezident ZŠA Donald Tramp płanuje siońnia sustrecca z hienieralnym sakratarom NATA Markam Rute i abmierkavać mahčymy vychad ZŠA z aljansu. Pra heta na bryfinhu paviedamiła pres-sakratarka Biełaha doma Kerałajn Levit, piša CNN.
Mark Rute i Donald Tramp u studzieni 2026 horda padčas abmierkavańnia pytańnia Hrenłandyi. Fota: Chip Somodevilla/Getty Images
Sustreča pavinna adbycca ŭ Avalnym kabiniecie i Tramp raźličvaje na adkrytuju i ščyruju razmovu. Pavodle słoŭ jahonaj pres-sakratarki, pytańnie pra vychad ZŠA z NATA sapraŭdy budzie ŭźniata padčas pieramoŭ.
Raniej Tramp užo krytykavaŭ sajuźnikaŭ pa aljansie. Jon ličyć, što jany nie padtrymali ZŠA ŭ kanflikcie ź Iranam i ŭvohule nie apraŭdvajuć čakańniaŭ, choć Amieryka vydatkoŭvaje vialikija srodki na ich abaronu. Na dumku amierykanskaha prezidenta, NATA dziejničaje nieraŭnapraŭna: ZŠA abaraniajuć inšych, ale nie atrymlivajuć dapamohi ŭ adkaz.
Taksama Tramp zajaŭlaŭ, što surjozna razhladaje mahčymaść vychadu krainy z aljansu. Jon adznačaŭ, što rasčaravańnie ŭ NATA ŭzmacniłasia paśla taho, jak jeŭrapiejskija krainy nie padtrymali jaho pazicyju ŭ roznych pytańniach, u tym liku adnosna Hrenłandyi, jakuju jon choča adabrać u inšaha člena NATA — Danii.
Vizit Rute ŭ Vašynhton praciahniecca niekalki dzion i prachodzić na fonie napružanych adnosin pamiž ZŠA i NATA.
Čytajcie taksama:
Rubia zajaviŭ, što ZŠA nieabchodna pieraasensavać značeńnie NATA
Jak pahroza z boku Rasii zrabiła Hiermaniju viadučaj vajskovaj siłaj Jeŭropy
Tramp choča pazbavić prava hołasu ŭ NATA tyja krainy, jakija traciać na abaronu mienš za 5% VUP
Tramp: Kali dla Jeŭropy vajna ŭ Iranie — nie ich vajna, to i vajna va Ukrainie — nie naša