Pakistan zafiksavaŭ parušeńnie režymu spynieńnia ahniu pamiž ZŠA i Iranam

Premjer-ministr Pakistana Šachbaz Šaryf paviedamiŭ u sacsietcy X, što ŭ zonie kanfliktu na Blizkim Uschodzie zafiksavanyja parušeńni režymu spynieńnia ahniu adrazu ŭ niekalkich miescach. Mienavita Pakistan vystupaje hałoŭnym pasiarednikam u pieramovach pamiž ZŠA i Iranam.

Paśla adnaho ź izrailskich udaraŭ pa horadzie Nabatyja. 6 krasavika 2026 hoda. Fota: Chris McGrath/Getty Images

Pa słovach Šachbaza Šaryfa, hetyja parušeńni padryvajuć mirny praces. Jon zaklikaŭ usie baki prajaŭlać strymanaść i vykonvać damoŭlenaść ab dvuchtydniovym spynieńni ahniu.

Adnačasova Iran prypyniŭ ruch sudnaŭ praz Armuzski praliŭ. Pavodle paviedamleńniaŭ, heta źviazana z tym, što Izrail praciahvaje vajennyja dziejańni suprać ruchu «Chiezbała» ŭ Livanie, niahledziačy na abvieščanaje pieramirje.

Jak paviedamlaje The Wall Street Journal sa spasyłkaj na svaje krynicy, Tehieran raniej pryhraziŭ, što moža pierahladzieć svajo rašeńnie ab paŭtornym adkryćci Armuzskaha praliva. Pradstaŭniki Irana taksama papiaredzili, što praciahnuć atakavać krainy rehijona, uklučajučy Izrail, kali izrailskija vajskoŭcy buduć nanosić udary pa Livanie i Iranie.

Raniej ZŠA i Iran zajavili ab damoŭlenaści pra dvuchtydniovaje spynieńnie ahniu, pry ŭmovie, što Iran adkryje sudnachodstva praz Armuzski praliŭ.

Kamientary da artykuła