U Pinsku padčas ramontu darohi pad asfaltam znajšli staradaŭni bruk

Padčas rekanstrukcyi vulicy Bresckaj u Pinsku rabočyja znajšli pad płastom asfaltu i hruntu stary kamienny bruk. Znachodku vyjavili budaŭniki, jakija pracujuć na čarhovym etapie madernizacyi hałoŭnaj haradskoj mahistrali, piša vydańnie «Miedyja-Paleśsie».

Fota: AAT «Budtrest №2»

Śpiecyjalisty miarkujuć, što hety bruk źjaviŭsia jašče ŭ mižvajenny pieryjad, kali terytoryja ŭvachodziła ŭ skład Polščy, to-bok da 1939 hoda. Takija darohi ŭ narodzie časta nazyvajuć «trylinkaj» abo «polskaj darohaj». Kab padrychtavać asnovu dla novaj sučasnaj darohi, staražytnaje pakryćcio ciapier raźbirajuć.

Vulica Bresckaja ličycca adnym z najstarejšych zachodnich napramkaŭ horada. Historyki adznačajuć, što daroha na hetym miescy isnavała jašče ŭ kancy XV stahodździa. Tut znachodziłasia Bieraściejskaja brama, praź jakuju padarožniki vyjazdžali na Vialikuju Bieraściejskuju darohu.

Sučasny vyhlad vulica pačała nabyvać u XIX stahodździ, kali Pinsk raźvivaŭsia jak pramysłovy centr. Pobač z darohaj źjavilisia zapałkavaja fabryka, fanierny i lesapilny zavody. Ale doŭhi čas daroha zastavałasia ŭ drennym stanie: paśla daždžoŭ jana pieratvarałasia ŭ bałota. Tamu ŭ pačatku XX stahodździa kamienny bruk staŭ važnym rašeńniem, bo dazvoliŭ zabiaśpiečyć ruch transpartu da pradpryjemstvaŭ.

Ciapier na miescy staroj darohi budujuć bolš šyrokuju i sučasnuju mahistral. A znojdzieny frahmient mastavoj staŭ napaminam pra historyju raźvićcia Pinska i pra toje, jak horad pastupova pieratvaraŭsia ŭ pramysłovy centr.

Kamientary da artykuła