Kažuć, Polšča dabiłasia najbolšaha prahresu ŭ śviecie pa biaśpiecy dla ŁHBT-padarožnikaŭ. A dzie ŭ rejtynhu Biełaruś?

Pry płanavańni pajezdki za miažu dla niekatorych padarožnikaŭ maje značeńnie nie tolki viza, ceny i nadvorje, ale i toje, jak u krainie staviacca da ludziej z roznaj seksualnaj aryjentacyjaj. Mienavita hety aśpiekt i sprabuje acanić mižnarodny rejtynh 2026 hoda, jaki paraŭnaŭ 216 krain i terytoryj pavodle ŭzroŭniu biaśpieki i pravavoj abarony. Dzie ŭ hetym śpisie apynułasia Biełaruś?

Fota: spartacus.gayguide.travel

Niamieckaje vydańnie Spartacus International Gay Guide štohod publikuje rejtynh krain pavodle ŭzroŭniu biaśpieki i pravavoj abarony dla ŁHBTK+ ludziej. Sam daviednik isnuje z 1970‑ch hadoŭ i ličycca adnym z najstarejšych śpiecyjalizavanych turystyčnych vydańniaŭ u hetaj śfiery. Z 2012 hoda redakcyja składaje asobny hłabalny indeks, u jakim paraŭnoŭvajecca situacyja ŭ roznych častkach śvietu.

Pry składańni rejtynhu analizujucca 18 kryteryjaŭ — ad antydyskryminacyjnaha zakanadaŭstva i mahčymaści zaklučeńnia šlubu abo hramadzianskaha partniorstva da zabarony prajdaŭ, vypadkaŭ kryminalnaha pieraśledu i najaŭnaści zakonaŭ, jakija praduhledžvajuć surjoznyja pakarańni za homaseksualnyja adnosiny. Krainy atrymlivajuć stanoŭčyja i admoŭnyja bały, jakija ŭ vyniku vyznačajuć ich miesca ŭ śpisie.

Gay Travel Index 2026 achoplivaje 216 krain i terytoryj. Pry hetym aŭtary asobna analizujuć situacyju ŭ kožnym štacie ZŠA, bo zakanadaŭstva tam istotna adroźnivajecca, a taksama vyłučajuć asobnyja rehijony — naprykład, Čačniu, jakaja fihuruje ŭ rejtynhu asobna ad Rasii.

Chto ŭ lidarach

Jak i letaś, Isłandyja zaniała pieršaje miesca. Druhoje miesca padzialili Malta i Ispanija. Paśla ich adrazu iduć Bielhija, Kanada, Partuhalija i Hiermanija. Heta krainy, dzie zakanadaŭstva harantuje šyrokija pravy i abaronu, a sacyjalnaje asiarodździe ličycca adnosna biaśpiečnym.

Siarod najbolš prykmietnych źmienaŭ hoda — rezki ŭźlot Polščy. Kraina padniałasia sa 118‑ha na 59‑ie miesca. Aŭtary źviazvajuć heta z palityčnymi źmienami i palapšeńniem pravavoj situacyi, u tym liku dla transhiendarnych ludziej.

Jašče adzin prykmietny zruch — Niepał, jaki padniaŭsia na 21 pazicyju i zaniaŭ 32‑ie miesca dziakujučy novym praviłam samaidentyfikacyi i rostu pryznańnia pravoŭ transhiendarnych ludziej.

Biełaruś i susiedzi

Biełaruś znachodzicca ŭ nižniaj tracinie śpisu. U paraŭnańni ź minułym hodam jana palepšyła svaju pazicyju — z 174‑ha na 132‑ie miesca.

U adnoj hrupie z našaj krainaj z takoj ža kolkaściu bałaŭ znachodziacca dva dziasiatki krain i terytoryj, siarod ich Bachrejn, Banhładeš, Centralna-Afrykanskaja Respublika, Ekvataryjalnaja Hvinieja, Vatykan, Kazachstan i Paŭnočnaja Kareja.

U paraŭnańni z susiednimi krainami Biełaruś zajmaje značna nižejšuju pazicyju. Litva, Łatvija i Polšča ciapier znachodziacca prykładna ŭ siaredzinie śpisu — u hrupie krain, što dzielać 59‑ie miesca.

Razam ź imi — Italija, Kiurasaa, Japonija, Vjetnam i Čarnahoryja. Ukraina zaniała 74‑ie miesca i znachodzicca ŭ adnoj hrupie ź Sierbijaj, Sinhapuram i Ałbanijaj.

Rasija ŭ 2026 hodzie zaniała 202‑ie miesca — heta krychu lepš, čym letaś, kali jana była na 206‑j pazicyi. U ahulnym śpisie jana apynułasia ŭ kampanii ź Nihieryjaj, Kataram, Tanzanijaj, Turkmienistanam i Paŭdniovym Sudanam.

Asobna ŭ rejtynhu paznačanaja Čačnia (212‑ie miesca). Razam ź joj u hetaj častcy śpisu — Afhanistan i Saudaŭskaja Aravija. Zamykajuć rejtynh Iran (215‑ie miesca) i Jemien (216-je).

Kamientary da artykuła