«Kubrakoŭ — małajčyna!». Łukašenka pachvaliŭ dziejnaść milicyi padčas napadu ŭ Smalavickim rajonie
Alaksandr Łukašenka pachvaliŭ apieratyŭnaść dziejańniaŭ milicyi pry reahavańni na ŭzbrojeny napad u Smalavickim rajonie. Pra heta jon zajaviŭ na mierapryjemstvie va ŭradzie, piša BiełTA.
«Pahladzieŭ na ministra Kubrakova. Małajčyna! Toje, što adbyłosia, toje adbyłosia. Ale praź niekalki chvilin, raniej chutkaj dapamohi (prybyli). Byŭ ministr tam i na miescy raźbiraŭsia, chto ŭ čym vinavaty. Tak pavinna być, kali my chočam ličyć siabie narodnaj dziaržavaj», — zajaviŭ jon.
16 lutaha kala 4.00 troje ŭzbrojenych zamiežnikaŭ 17‑18 hadoŭ uvarvalisia ŭ pryvatny dom u ahraharadku Budahova, raźbiŭšy akno. Užyvajučy fizičnuju siłu, vykarystoŭvajučy bitu i pistalety, jany nanieśli množnyja traŭmy 63‑hadovamu haspadaru, jaho 65‑hadovaj žoncy i 67‑hadovamu bratu. U domie była ŭstalavanaja tryvožnaja knopka Departamienta achovy MUS. Haspadar žylla paśpieŭ jaje nacisnuć pierad tym, jak złamyśniki raźbili akno.