Kolki biełych busłoŭ žyvie ŭ Biełarusi?

Biełaruskija arnitołahi za 2025 hod padviali vyniki nacyjanalnaha ŭliku biełych busłoŭ, jaki prachodziŭ u 2024 hodzie ŭ ramkach VIII mižnarodnaha ŭliku vidu pry dapamozie Minpryrody, Minadukacyi i kampanii «Dzikaja pryroda», piša telehram-kanał «Dzikaja pryroda pobač».

Zdymak ilustracyjny. Fota: «Naša Niva»

Jość dobraja navina — papulacyja busłoŭ u Biełarusi vyrasła!

Na probnych placoŭkach u roznych rajonach byŭ zrobleny absalutny ŭlik, vyniki jakich byli ekstrapalavanyja na ŭsiu krainu. Ciapier u krainie hniazdujecca 25,5—26,0 tysiač par — heta kala 8% suśvietnaj papulacyi vidu. Za 10 hadoŭ kolkaść hniazdavalnych par pavialičyłasia na 12% (u paraŭnańni z 2014 hodam).

Tradycyjnaje buślinaje «razdolle» — na poŭdni krainy, u pojmie Prypiaci. Mienavita tut znachodzicca vioska-čempijon: Malešaŭ (Žytkavicki rajon) z 61 žyłym hniazdom!

Troški adstali: ahraharadok Dzivin (Kobrynski rajon) — 40 hniozdaŭ, i vioska Ladziec (Stolinski rajon) — 38 hniozdaŭ.

U 2024 hodzie bolšaść par vyraścili ad 1 da 5 ptušaniat. Ale ŭ Kamianieckim i Minskim rajonach nazirali vyvadki z šaści buślaniat!

Z kiepskich navin — usio bolš busłoŭ addajuć pieravahu słupam ŁEP — zaraz heta 63%. Elektryki raspracavali śpiecyjalnyja słupy z hniezdavymi płatformami, ale staviać ich marudna, nie tysiačami, a dziasiatkami. Ale dobra i toje.

Hłabalny ŭlik biełych busłoŭ arhanizujecca kožnyja 10 hadoŭ va ŭsich krainach areału busła. Rehularnyja padliki ptušak dapamahajuć adsočvać źmieny ŭ ich papulacyjach na łakalnym i hłabalnym uzroŭniach.

Kamientary da artykuła