Z-za dziaržaŭnych abmiežavańniaŭ u Biełarusi admianili ŭžo druhi štohadovy fiestyval
U 2026 hodzie nie buduć pravodzić tradycyjny fiestyval WOSTRAU u Niaśvižy. Arhanizatary patłumačyli, što paśla nabyćcia mocy pastanovaj Savieta Ministraŭ № 454 ad 22 žniŭnia 2025 hoda jany nie zmohuć pravieści fiestyval na zvykłym uzroŭni.
Heta pastanova ŭvodzić abaviazkovy dziaržaŭny rejestr arhanizataraŭ kulturna-vidoviščnych mierapryjemstvaŭ, u jakim pavinny być zarehistravanyja jurydyčnyja asoby, što pravodziać padobnyja padziei ź biełaruskimi abo zamiežnymi vykanaŭcami.
Biez uklučeńnia ŭ hety rejestr arhanizacyja mierapryjemstvaŭ z udziełam zamiežnych artystaŭ stała niezakonnaj. Arhanizatary padkreślivajuć, što ŭ novych umovach jany nie mohuć samastojna takich artystaŭ pryvozić, tamu praviadzieńnie fiestyvalu na vysokim uzroŭni stała niemahčymym.
Anałahičnaja situacyja raniej adbyłasia taksama ź fiestyvalem «Soncastajańnie» ŭ Pružanach, dzie taksama admianili mierapryjemstva ŭ 2026 hodzie, bo kampanija nie była ŭklučanaja ŭ rejestr Ministerstva kultury i straciła prava zaprašać zamiežnych (u asnoŭnym rasijskich) artystaŭ.
Čytajcie taksama:
Fiestyvalu «Soncastajańnie» ŭ Pružanach u nastupnym hodzie nie budzie
«Hojda» za 700 rubloŭ. «Kašalok Łukašenki» druhi hod zapar pryvozić u Biełaruś Z-artystaŭ