Byłoha namieśnika staršyni BNF Anatola Fiodarava raźbiŭ insult prosta padčas strymu Piatruchina
Aktyvist viadomy ŭ fejsbuku jak Balasłaŭ Vołat — radykalny apanient Śviatłany Cichanoŭskaj i kaleha Dźmitryja Bałkunca ŭ jaho «Ultymatumach».
Anatol Fiodaraŭ. Fota: Radyjo Racyja
23 studzienia Anatol Fiodaraŭ vystupaŭ u strymie błohiera Siarhieja Piatruchina. U apošnija chviliny videa jon prymusiŭ hledačoŭ pra siabie pachvalavacca — było zaŭvažna, što pažyłomu aktyvistu ciažka havaryć.
Jak raskazali «Našaj Nivie» siabry Fiodarava, u aktyvista prosta ŭ žyvym efiry zdaryŭsia insult. Uviečary paśla tranślacyi jaho zabrała chutkaja dapamoha. Fiodaraŭ užo moža havaryć, ale siabry kažuć, što jaho čakaje doŭhi šlach adnaŭleńnia.
72‑hadovy Anatol Fiodaraŭ — daŭni aktyvist BNF. Udzielničaŭ u dysidenckim ruchu jašče ŭ saviecki čas. Byŭ namieśnikam staršyni Biełaruskaha narodnaha frontu, uznačalvaŭ mahiloŭskuju supołku. U 2020‑m udzielničaŭ u pratestach, traplaŭ na sutki.
U emihracyi stvaryŭ «Nacyjanalna-demakratyčnuju płatformu», padtrymlivaje Dźmitryja Bałkunca ŭ jahonych inicyjatyvach nakštałt «Ultymatumu da Łukašenki», rezka krytykuje Ofis Śviatłany Cichanoŭskaj.
U sacsietkach Fiodaraŭ vystupaje pad nikam Balasłaŭ Vołat — mienavita tak jon byŭ pradstaŭleny ŭ apisańni da strymu Piatruchina.