Hramadzianina Litvy asudzili ŭ Polščy za žadańnie supracoŭničać ź biełaruskim KDB
Hramadzianin Litvy Saŭlus V. byŭ asudžany Akruhovym sudom u Biełastoku 9 studzienia 2026 hoda da adnaho hoda pazbaŭleńnia voli. Sud pryznaŭ jaho vinavatym u niaŭdałaj sprobie prapanavać svaju dapamohu zamiežnaj raźviedcy ź dziejnaściu, nakiravanaj suprać Polščy i Złučanych Štataŭ Amieryki — sajuźnika Polščy pa NATA. Za takoje złačynstva polskaje zakanadaŭstva praduhledžvaje pakarańnie ad šaści miesiacaŭ da vaśmi hadoŭ źniavoleńnia, paviedamlaje pres-słužba Ahienctva ŭnutranaj biaśpieki Polščy.
Budynak KDB u Minsku. Zdymak ilustracyjny. Fota: Lookby.media
Padstavaj dla pačatku rasśledavańnia stali materyjały, sabranyja supracoŭnikami Ahienctva ŭnutranaj biaśpieki (AUB). Ź ich vynikała, što Saŭlus V., jaki vydavaŭ siabie za dziejnaha aficera CRU ZŠA, u pieryjad z kanca listapada 2024 hoda da siaredziny sakavika 2025 hoda zajaŭlaŭ pra hatoŭnaść pieradavać infarmacyju Kamitetu dziaržaŭnaj biaśpieki Respubliki Biełaruś, nanosiačy škodu intaresam ZŠA. Pry hetym jon vykarystoŭvaŭ sučasnyja technałohii, u tym liku mahčymaści štučnaha intelektu.
14 sakavika 2025 hoda mužčynu zatrymali supracoŭniki AUB, a sud pa chadajnictvie prakurora źmiaściŭ jaho pad vartu. U vynikovym prysudzie sud uličyŭ uvieś pieryjad faktyčnaha źniavoleńnia — z momantu zatrymańnia da vyniasieńnia prysudu. Rašeńnie suda ŭstupiła ŭ zakonnuju siłu. Rasśledavańnie viałosia biełastockim padraździaleńniem AUB pad nahladam prakuratury, jakaja zajmajecca spravami arhanizavanaj złačynnaści i karupcyi.
Čytajcie taksama:
KDB pačaŭ karjeru Kardaš, padsunuŭšy jaje ŭ Minsku 55‑hadovamu huru ŭkrainskaj žurnalistyki