Pabiŭšy rekord, ceny na kvatery ŭ Minsku pačali prasiadać. Kolki ciapier u siarednim prosiać za mietr?
Pry kancy 2025 hoda cana na kvadrat u Minsku pieravaliła adznaku $2000, tym samym pabiŭšy rekord 2007 hoda. Ale ŭžo ŭ pieršy miesiac 2026‑ha nazirajecca spad.
Fota: LookByMedia
Pavodle statystyki Realt.by, pikavyja ceny naziralisia 28 śniežnia 2025 hoda, kali siaredni košt mietra ŭ stalicy pa prapanovach vyras da 2083 dalaraŭ.
Paśla ŭstalavańnia rekordu, ceny pačali iści ŭniz i ŭžo z 11 studzienia apuścilisia nižej za 2 tysiačy dalaraŭ.
Skrynšot: realt.by
Pa stanie na 25 studzienia siaredni košt mietra ŭ Minsku pa prapanovach składaje 1960 dalaraŭ, što amal na 6% mienš, čym było miesiacam raniej.
U svaju čarhu 2025 hod nie tolki pabiŭ rekord 2007-ha, ale i staŭ rekordnym pa roście cen u dalaravym vymiareńni. Cana prapanovy kvadratnaha mietra ŭ Minsku za minuły hod vyrasła na 47%: z $1416 da $2084.
Pry hetym varta razumieć, što važnym faktaram takoha rostu stała ŭmacavańnie biełaruskaha rubla da dalara.
Samyja nizkija ceny za apošniuju piacihodku byli zafiksavanyja naprykancy listapada 2022 hoda. Tady za «kvadrat» u stalicy ŭ siarednim prasili pa $1153.
Što da dalejšaha rostu cen, to jon u 2026 hodzie małavierahodny. Aproč taho, što ceny na nieruchomaść i biez taho stali vysokimi, statystyka prodažaŭ u śniežni 2025 hoda istotna prasieła (za apošniuju piacihodku mienš ździełak u śniežni było tolki ŭ kavidnym 2020-m).
Za śniežań było 1315 ździełak pa Minsku, što na 15% mienš, čym u śniežni 2024-ha. U biahučym miesiacy prodažy taksama pakul bolš kvołyja, čym byli ŭ studzieni 2025 hoda.