Ispanija budzie pryznavać praterminavanyja pašparty biełarusaŭ

U Ispanii apublikavanaja instrukcyja, zhodna ź jakoj pašparty hramadzian Biełarusi, što znachodziacca ŭ hetaj krainie, mohuć pryznavacca sapraŭdnymi navat paśla zakančeńnia terminu dziejańnia — bieź nieabchodnaści atrymańnia paśviedčańnia ab rehistracyi (cédula de inscripción). Pra heta paviedamiła pres-słužba Śviatłany Cichanoŭskaj.

Śviatłana Cichanoŭskaja z Chase Manuelem Albaresam padčas vizitu ŭ Madryd 20 červienia 2025 hoda. Fota: Ofis Śviatłany Cichanoŭskaj

Heta stała vynikam damoŭlenaściaŭ Ofisa Śviatłany Cichanoŭskaj z uładami Ispanii. 20 červienia 2025 hodu Śviatłana Cichanoŭskaja viała pra heta pieramovy ź ministram zamiežnych spraŭ hetaj krainy Chase Manuelem Albaresam, a ŭ studzieni 2026 hoda jany byli pry padtrymcy inšych ministerstvaŭ uvasoblenyja ŭ žyćcio.

19 studzienia ŭ Madrydzie ź vizitam znachodziŭsia dypłamatyčny daradca Śviatłany Cichanoŭskaj Dzianis Kučynski, jaki pravioŭ sustreču ź dziaržaŭnym sakratarom Ministerstva zamiežnych spraŭ Ispanii Dyjeha Marcinesam Bielia.

Dyjeha Marcines Bielia i Dzianis Kučynski. Fota Śviatłany Cichanoŭskaj

U chodzie sustrečy baki vyznačyli klučavyja napramki supracoŭnictva z demakratyčnymi siłami Biełarusi, zakranuli aktualnyja mižnarodnyja i humanitarnyja pytańni, situacyju z palityčnymi źniavolenymi i sankcyjnuju palityku Jeŭrapiejskaha Sajuza i Ispanii ŭ dačynieńni da režymu Łukašenki. 

Asobnaj temaj sustrečy stała pytańnie adkryćcia Misii demakratyčnych siłaŭ Biełarusi ŭ Madrydzie, jakaja moža stać važnym centram kaardynacyi dziejnaści biełaruskaha pradstaŭnictva i padtrymki biełarusaŭ u Ispanii.

Dzianis Kučynski pieradaŭ dziaržaŭnamu sakrataru dakumient z apisańniem najaŭnych prablem i šlachoŭ ich vyrašeńnia, jaki byŭ padrychtavany na asnovie prapanoŭ biełarusaŭ Ispanii. 

Kamientary da artykuła