U Rasii zajavili pra zapavoleńnie pracy Telegram

Raskamnahlad zapavolvaje pracu miesiendžara Telegram z-za taho, što płatforma, na dumku rasijskich uładaŭ, zanadta marudna błakuje ananimnyja kanały. Pra heta paviedamiŭ člen kamiteta rasijskaj Dziarždumy pa infarmacyjnaj palitycy Andrej Śvincoŭ, piša RBK.

Zdymak ilustracyjny. Fota: «Naša Niva»

Pa słovach deputata, u Rasii chacieli b całkam admovicca ad ananimnaści ŭ internecie, i mienavita tamu Telegram atrymlivaje takija «sihnały». Pry hetym Śvincoŭ adznačyŭ: kali parušeńni buduć likvidavanyja, zapavoleńnie pracy servisu spynicca.

Raniej ŚMI sa spasyłkaj na krynicy na telekamunikacyjnym rynku paviedamlali, što Raskamnahlad užo častkova abmiažoŭvaje dostup da Telegram. U toj ža čas Śvincoŭ padkreślivaŭ, što poŭnaja błakiroŭka miesiendžara ŭ krainie nie płanujecca, bo jon davoli efiektyŭna supracoŭničaje z uradami roznych dziaržaŭ, ale pry ŭmovie vykanańnia ŭsich patrabavańniaŭ zakanadaŭstva.

Taksama deputat nahadaŭ, što padstaŭ dla źniaćcia abmiežavańniaŭ z WhatsApp pakul niama. Raniej, u žniŭni 2025 hoda, Raskamnahlad abmiežavaŭ zvanki ŭ Telegram i WhatsApp, rastłumačyŭšy heta tym, što servisy vykarystoŭvajucca dla machlarstva, vymahalnictva i viarboŭki ŭ terarystyčnuju dziejnaść.

U kastryčniku minułaha hoda viedamstva anansavała dadatkovyja miery pa častkovym abmiežavańni pracy WhatsApp. U śniežni byli zafiksavanyja masavyja zboi ŭ jaho pracy, paśla čaho Raskamnahlad zajaviŭ, što z-za parušeńniaŭ zakona servisu moža pahražać poŭnaja błakiroŭka. Paźniej kampanija zajaviła, što maje namier zmahacca za svaju aŭdytoryju ŭ Rasii.

Kamientary da artykuła