Tramp nazvaŭ siabie «vykanaŭcam abaviazkaŭ prezidenta Vieniesueły»

Prezident ZŠA Donald Tramp apublikavaŭ u sacyjalnaj sietcy Truth Social post, u jakim nazvaŭ siabie «vykanaŭcam abaviazkaŭ prezidenta Vieniesueły». Jon raźmiaściŭ padroblenuju staronku Vikipiedyi z ułasnym aficyjnym partretam, dzie śćviardžałasia, što jon uznačalvaje nie tolki ZŠA, ale i Vieniesuełu.

Donald Tramp. Fota: Win McNamee / Getty Images

Na samaj spravie ŭ realnaj Vikipiedyi Tramp paznačany tolki jak dziejny prezident Złučanych Štataŭ sa studzienia 2025 hoda.

Zajava Trampa stała praciaham jahonych słoŭ pra toje, što ZŠA faktyčna kantralujuć Vieniesuełu paśla taho, jak 3 studzienia amierykanski śpiecnaz pravioŭ apieracyju pa zachopie prezidenta krainy Nikałasa Madura. Jaho razam z žonkaj vyvieźli z rezidencyi ŭ Karakasie i dastavili ŭ Ńju-Jork.

Takoje fota źjaviłasia na staroncy Donalda Trampa ŭ Truth Social

U intervju The New York Times Tramp zajaviŭ, što Złučanyja Štaty mohuć kiravać Vieniesuełaj i karystacca jaje naftavymi resursami na praciahu doŭhaha času. Na pytańnie, ci idzie havorka pra niekalki miesiacaŭ abo hod, jon adkazaŭ, što kantrol moža praciahvacca «značna daŭžej». Pa słovach prezidenta ZŠA, tolki čas pakaža, jak doŭha Vašynhton budzie ažyćciaŭlać pramy nahlad za krainaj z nasielnictvam kala 28,5 miljona čałaviek.

U Vieniesuele z takoj pazicyjaj nie zhodnyja. Časovaja kiraŭnica krainy Dełsi Radryhies zajaviła, što ŭłada naležyć narodu i kanstytucyjnamu ŭradu, a krainaj praciahvaje kiravać urad prezidenta Madura, pakul jon znachodzicca ŭ pałonie. Tym nie mienš urad Vieniesueły paviedamiŭ pra namier pačać dyjałoh z ZŠA dla adnaŭleńnia dypłamatyčnych adnosin. Taksama było paćvierdžana, što pradstaŭniki Dziarždepartamienta ZŠA ŭžo naviedali Karakas, a vieniesuelski bok razhladaje mahčymaść vizitu ŭ Vašynhton. Tramp śćviardžaje, što Radryhies całkam supracoŭničaje z ZŠA.

Apieracyja pa zachopie Madura vyklikała rezkuju krytyku z boku lidaraŭ krain Paŭdniovaj Amieryki. Na hetym fonie Tramp taksama vystupiŭ z pahrozami ŭ adras inšych dziaržaŭ rehijona. Niekalki dzion tamu jon zajaviŭ, što ZŠA płanujuć pačać naziemnyja vajennyja apieracyi ŭ Mieksicy suprać narkakartelaŭ, adnak kankretnych terminaŭ i maštabaŭ hetych dziejańniaŭ nie nazvaŭ.

Kamientary da artykuła