Tramp pahražaje Kubie: Zaklučycie ździełku, pakul nie pozna

«NA KUBU BOLŠ NIE BUDZIE PASTUPAĆ NI NAFTY, NI HROŠAJ — NUL!»

Fota: AP Photo/Alex Brandon

Prezident ZŠA Donald Tramp znoŭ źviarnuŭ svaju ŭvahu na Kubu.

«Ciaham mnohich hadoŭ Kuba žyła na vialikija abjomy nafty i hrošaj ź Vieniesueły. U svaju čarhu, Kuba akazvała «pasłuhi biaśpieki» dvum apošnim vieniesuelskim dyktataram, ale bolš hetaha nie budzie!» — napisaŭ Tramp u svajoj sacsietcy.

«Vieniesuełu ciapier abaraniajuć Złučanyja Štaty Amieryki, jakija vałodajuć samymi mahutnymi ŭzbrojenymi siłami ŭ śviecie (na siońniašni dzień!), i my budziem abaraniać ich. NA KUBU BOLŠ NIE BUDZIE PASTUPAĆ NI NAFTY, NI HROŠAJ — NUL! Ja nastojliva rekamienduju im zaklučyć ździełku, PAKUL NIE STAŁA ZANADTA POZNA», — dadaŭ Tramp.

Kuba šmat hadoŭ atrymlivała naftu ź Vieniesueły (i mieniej — ź Mieksiki). A kubincy ŭvachodzili ŭ skład asabistaj achovy Nikałasa Madura. Padčas amierykanskaj apieracyi zachopu Madura byli zabityja 32 kubincy.

Prezident Kuby Mihiel Dyjas-Kaniel adreahavaŭ na słovy Trampa. «Kuba — svabodnaja, niezaležnaja i suvierennaja kraina. Nichto nie dyktuje nam, što rabić», — napisaŭ jon u X. «Tyja, chto pieratvaraje ŭsio ŭ biznes, navat čałaviečyja žyćci, nie majuć prava ŭkazvać Kubie na što-niebudź, absalutna ni na što».

Pra kankretnyja płany nakont Kuby Tramp pakul nie kazaŭ. Cikava, što ciapierašni dziaržsakratar ZŠA Marka Rubia — syn kubinskich mihrantaŭ.

Kamientary da artykuła