«My całkam razumiejem, jakaja tam dziaržava». Litoŭskija pieravozčyki nie źbirajucca padavać pazovy ŭ biełaruskija sudy praz zatrymanyja fury

Asacyjacyja pieravozčykaŭ «Linava» paśla kansultacyj ź jurystami razhladaje mahčymaść admovicca ad idei padavać sudovy pazoŭ da ŭrada Litvy z patrabavańniem kampiensacyi strat. Pra heta paviedamiŭ prezident arhanizacyi Erłandas Mikienas. Pavodle jaho słoŭ, zamiest sudovaha šlachu asacyjacyja schilajecca da pačatku niepasrednaha dyjałohu z uładami pry ŭdziele advakataŭ.

Zdymak ilustracyjny. Fota: «Naša Niva»

Erłandas Mikienas adznačyŭ, što paśla razmoŭ ź siamiu advakackimi kantorami pazicyja «Linavy» źmianiłasia: hałoŭnaj metaj ciapier źjaŭlajucca nie pazovy, a pošuk ahulnaha rašeńnia razam z uradam. Mikienas vykazaŭ spadziavańnie, što ŭ vyniku pieramoža zdarovy sens i baki zmohuć vyjści z kryzisnaj situacyi šlacham damoŭlenaściaŭ.

Raniej na hetym tydni kiraŭnik asacyjacyi zajaŭlaŭ, što bolš za sto transpartnych kampanij byli hatovyja dałučycca da kalektyŭnaha pazovu, bo na miažy ź Biełaruśsiu praciahvali zatrymlivacca hruzaviki. Adnak ciapier «Linava» bolš schilajecca da supolnaj pracy z uradam.

Pavodle Mikienasa, meta pieravozčykaŭ — padšturchnuć ułady da realnych dziejańniaŭ, bo dahetul, na jaho dumku, adbyvajecca tolki ŭzajemnaje pierakidańnie adkaznaści i abvinavačańni. Zamiest hetaha biznes čakaje kanstruktyŭnaha dyjałohu i pošuku rašeńniaŭ, jakija dazvolili b pieravozčykam padtrymać urad.

Pry hetym kiraŭnik «Linavy» znoŭ adchiliŭ prapanovy palitykaŭ padavać pazovy suprać Biełarusi. Jon padkreśliŭ, što kryzis uźnik u vyniku palityčnych pastanoŭ, tamu mienavita litoŭskaja ŭłada pavinna pieršaj uziać na siabie inicyjatyvu pa jaho vyrašeńni. Mikienas adznačyŭ, što sudzicca ŭ Biełarusi faktyčna niemahčyma z-za tamtejšaha stanu pravavoj sistemy.

«Biełarusi pazovaŭ my nie vystaŭlajem. My ŭzajemadziejničajem z peŭnymi biełaruskimi instytucyjami na ŭzroŭni asacyjacyj i całkam razumiejem, jakaja tam dziaržava, jaki pravavy «biespriedieł». Zdajecca, što mahčymaściaŭ dla sudovych razhladaŭ tam u nas prosta niama», — zapeŭniŭ pradstaŭnik litoŭskich pieravozčykaŭ.

Taksama jon raskrytykavaŭ sposab kamunikacyi litoŭskaha ŭrada ź pieravozčykami, zajaviŭšy, što abmierkavańnie prablem praź ŚMI, a nie za stałom pieramoŭ, vyhladaje absurdna i moža naškodzić intaresam Litvy. Pavodle jaho słoŭ, biełaruskija ŭłady bačać i čujuć usie publičnyja zajavy, što moža być vykarystana suprać samich pieravozčykaŭ i krainy ŭ cełym.

Akramia taho, Mikienas adznačyŭ, što pieravozčyki nie atrymlivajuć pramoj infarmacyi pra toje, jakija kroki ŭrad robić dla viartańnia hruzavikoŭ ź Biełarusi. Z-za hetaha stvarajecca ŭražańnie, što nijakich realnych dziejańniaŭ nie viadziecca, a prablemy haliny ihnarujucca.

Kryzis na biełaruska-litoŭskaj miažy ŭźnik paśla taho, jak Biełaruś niekalki miesiacaŭ vykarystoŭvała kantrabandnyja pavietranyja šary dla parušeńnia pavietranaj prastory Litvy. U adkaz litoŭski ŭrad u kancy kastryčnika minułaha hoda zakryŭ punkty propusku ŭ Miednikach i Salečnikach. Paśla hetaha režym Łukašenki zabaraniŭ litoŭskim hruzavikam ruchacca pa terytoryi krainy, u vyniku čaho mnohija mašyny byli vymušany stajać na śpiecyjalnych placoŭkach za płatu. Situacyja nie vyrašyłasia i paśla taho, jak litoŭski ŭrad adkryŭ miažu, nie čakajučy zakančeńnia ad pačatku pryznačanaha miesiačnaha terminu.

Kamientary da artykuła