Ekvataryjalnaja Hvinieja pieraniesła stalicu z vostrava na maciaryk

Stalicu Ekvataryjalnaj Hviniei pieranieśli z vostrava Bijoka na macierykovuju častku krainy. Heta rašeńnie pryniata ŭ metach pavyšeńnia biaśpieki dziaržaŭnych instytutaŭ i palapšeńnia łahistyki, paviedamlaje miascovaje vydańnie Guinea Ecuatorial Press. Adpaviedny ŭkaz padpisaŭ prezident krainy Tieadora Abijanh Nhiema Mbasoha.

Fota: pdge-guineaecuatorial.com

Novaj stalicaj staŭ horad Sjudad-de-ła-Pas (u pierakładzie ź ispanskaj movy «Horad miru»), jaki zamianiaje horad Małaba. U dakumiencie adznačajecca, što pieranos centru kiravańnia dziaržavaj harantuje biaśpieku ŭstanoŭ ułady i zabiaśpiečvaje raŭnamiernaje raźvićcio ŭsich rehijonaŭ krainy.

Małaba, dziakujučy svajmu astraŭnomu raźmiaščeńniu, ličycca ŭraźlivym pierad źniešnimi pahrozami, tady jak novaja stalica ŭ centry macieryka stanie «maciarynskaj krepaściu suvierenitetu» i ruchavikom prahresu dla hramadzian krainy.

Budaŭnictva horada Sjudad-de-ła-Pas pačałosia jašče ŭ 2012 hodzie z raźlikam na budučuju rolu horada jak stalicy. Jon raźmieščany na race Viele, za 160 kiłamietraŭ ad uźbiarežža Atłantyčnaha akijana, za 25 kiłamietraŭ ad miažy z Habonam i za 60 kiłamietraŭ ad Kamieruna, a akružajuć jaho hustyja trapičnyja lasy. Horad raźličany na 200 tysiač žycharoŭ.

Bolšaść ministerstvaŭ i dziaržaŭnych ustanoŭ užo pierajechała z Małaba ŭ Sjudad-de-ła-Pas. Pry hetym Małaba zachavaje častku dziaržaŭnych słužbaŭ, uklučajučy Ministerstva zamiežnych spraŭ i Ministerstva vuhlevadarodaŭ dy raźvićcia hornaj pramysłovaści. Taksama pakul nie płanujuć pierajezdu ŭ novuju stalicu pasolstvy zamiežnych dziaržaŭ i hałoŭnyja ofisy bujnych kampanij i bankaŭ.

Małaba, dzie žyvie kala 350 tysiač čałaviek, zastajecca hałoŭnym kamiercyjnym i finansavym centram krainy navat paśla pieranosu administracyjnaj stalicy.

Kamientary da artykuła