Žonka daradcy Trampa apublikavała kartu Hrenłandyi ŭ kolerach ściaha ZŠA

Žonka daradcy prezidenta ZŠA pa pytańniach unutranaj biaśpieki Styviena Milera, Keci Miler, raźmiaściła ŭ sacyjalnaj sietcy X vyjavu karty Hrenłandyi, afarbavanaj u kolery amierykanskaha ściaha. Publikacyju jana supravadziła karotkim podpisam: «Chutka».

Fota: KatieMiller / X

Na hety dopis adreahavaŭ pasoł Danii ŭ ZŠA Jeśpier Mioler Sierensien. Jon padkreśliŭ, što Złučanyja Štaty i Karaleŭstva Danija źjaŭlajucca blizkimi sajuźnikami i pavinny praciahvać supracoŭnictva. Pa jaho słovach, biaśpieka ZŠA nieparyŭna źviazanaja ź biaśpiekaj Hrenłandyi i Danii, a sama Hrenłandyja ŭžo ŭvachodzić u NATA.

Dypłamat taksama adznačyŭ, što Danija i ZŠA sumiesna pracujuć nad umacavańniem biaśpieki ŭ Arktycy. Pry hetym jon padkreśliŭ važnaść poŭnaj pavahi da terytaryjalnaj cełasnaści Karaleŭstva Danija.

Stalica Hrenłandyi — Nuuk. Fota: Steffen Trumpf / picture alliance via Getty Images

Vydańnie The Guardian nahadvaje, što jašče ŭ śniežni dackaja vajskovaja raźviedka nazvała ZŠA pahrozaj biaśpiecy — zajava, jakaja ŭ dačynieńni da sajuźnika pa NATA raniej zdavałasia niemahčymaj. Hazieta taksama piša, što mahčymyja radykalnyja dziejańni ZŠA, u tym liku źviaržeńnie vieniesuelskaha prezidenta Nikałasa Madura, vyklikali surjoznuju zakłapočanaść va ŭradaŭ Danii i Irana.

Ranicaj 3 studzienia ZŠA nanieśli avijaŭdary pa Vieniesuele i zatrymali prezidenta Madura razam z žonkaj. Vieniesuelskaha lidara dastavili ŭ śledčy izalatar u Ńju-Jorku, dzie jamu vystavili abvinavačańni ŭ narkateraryźmie. Donald Tramp zajaviŭ, što ZŠA buduć faktyčna kiravać Vieniesuełaj da momantu, pakul nie adbudziecca «naležny pierachodny pieryjad».

Kamientary da artykuła