Zialenski i Tramp sustrelisia ŭ Fłarydzie dla pieramoŭ ab miry

U pryvatnaj rezidencyi prezidenta ZŠA ŭ Mar-a-Łaha ŭ štacie Fłaryda pačałasia sustreča prezidentaŭ Ukrainy i ZŠA Uładzimira Zialenskaha i Donalda Trampa.

Uładzimir Zialenski i Donald Tramp. Fota: AP Photo/Alex Brandon

Lidary sustrelisia na hanku, ich sustreča tranślavałasia ŭ žyvym efiry. Sustreča, jakaja pavinna była pačacca a 9‑j viečara pa biełaruskim časie (a 1‑j dnia pa miascovym), pačałasia sa spaźnieńniem amal na paŭhadziny.

Hetaja sustreča, jak paviedamlajecca, budzie całkam pryśviečanaja pytańniu ŭkrainska-rasijskaha zamireńnia i budzie hruntavacca na papiaredniaj pracy pieramoŭnych kamand, jakija pierad tym napracavali płan z 20 punktaŭ.

«Płan z 20‑ci punktaŭ — vielmi važny, my pavinny jaho abmierkavać. Našy kamandy pracavali nad stratehijaj, jak krok za krokam nablizić mir. I my abmiarkujem stratehiju», — skazaŭ Zialenski ŭ pačatku sustrečy z Trampam.

«U mianie niama dedłajnaŭ. Moj adziny dedłajn — skončyć vajnu. I my stali na šlach zaviaršeńnia», — zajaviŭ u svaju čarhu Donald Tramp.

Jon upeŭnieny:

«My znachodzimsia na zaviaršalnaj stadyi pieramoŭ. Jany albo skončacca, albo praciahnucca jašče doŭha. Miljony ludziej zahinuć, a hetaha nichto nie choča».

Ź jahonych słoŭ, nichto navat nie viedaje, što budzie prapisana ŭ pahadnieńni ab biaśpiecy, ale samo pahadnieńnie budzie, i prytym mocnaje.

Što da ciapierašniaj sustrečy, to Tramp vieryć, što jana projdzie vydatna, a paśla jaje jon maje namier patelefanavać Pucinu i «dumaju, što ŭžo nie budzie tak składana, jak było raniej». Pry hetym Pucinu jon telefanavaŭ i niezadoŭha da sustrečy.

Paśla karotkich pratakolnych vystupleńniaŭ sustreča pierajšła ŭ zakryty farmat.

Kamientary da artykuła