U Kanadzie dazvolili źbirać podpisy za refierendum ab adździaleńni hałoŭnaj naftazdabyŭnoj pravincyi

U Kanadzie dazvolili pačać zbor podpisaŭ za praviadzieńnie refierendumu ab niezaležnaści Albierty — hałoŭnaj naftadabyŭnoj pravincyi krainy. Kamisija pa vybarach Albierty padtrymała inicyjatyvu hrupy Alberta Prosperity Project («Prajekt roskvitu Albierty»), paviedamlaje CBC.

Pravincyja Albierta na karcie Kanady. Fota: Wikimedia Commons

Da pačatku studzienia hrupa pavinna pryznačyć finansavaha dyrektara, paśla čaho možna budzie aficyjna raspačać kampaniju. U pietycyi prapanujecca vynieści na hałasavańnie pytańnie: «Ci zhodnyja vy, što pravincyja Albierta pavinna pierastać być častkaj Kanady i stać niezaležnaj dziaržavaj?»

Pavodle pravił, arhanizatary pavinny za čatyry miesiacy sabrać nie mienš za 178 tysiač podpisaŭ, što składaje kala 3,5% nasielnictva Albierty. U samoj hrupie ŭžo naličvajecca kala 2 tysiač čałaviek, a jašče prykładna 240 tysiač žycharoŭ nibyta hatovyja padtrymać inicyjatyvu svaimi podpisami.

Raniej u hetym hodzie sproba pravieści refierendum pravaliłasia: sud pryznaŭ pieršapačatkovuju farmuloŭku pytańnia niekanstytucyjnaj. Paśla hetaha praviły praviadzieńnia refierendumaŭ pa hramadzianskaj inicyjatyvie byli źmienienyja, što dazvoliła hrupie pierafarmulavać pytańnie i paŭtorna padać zajaŭku.

Panarama načnoha Edmantana. Fota: Wikimedia Commons

Albierta — klučavaja naftazdabyŭnaja pravincyja Kanady, dzie znachodzicca 95—97% raźviedanych zapasaŭ nafty krainy, pieravažna ŭ vyhladzie bituminoznych naftavych piaskoŭ. Pravincyja raźmieščanaja na zachadzie krainy, na poŭdni jana miažuje z amierykanskim štatam Mantana.

Albierta ŭvajšła ŭ skład Kanady ŭ 1905 hodzie. Jaje administracyjny centr — Edmantan, najbolšy horad — Kałhary. Nasielnictva pravincyi pieravyšaje 4 miljony čałaviek.

Kamientary da artykuła