Aryštavany huślar «Staroha Olsy» Aleś Čumakoŭ
Jaho abviaścili členam «ekstremisckaha farmavańnia» «Da Zoraŭ». Pa mierkavańni KDB, tudy ŭvachodziać jon, a taksama Siamion Małašenkaŭ.
Aleś Čumakoŭ naradziŭsia 14 červienia 1981 hoda ŭ Minsku. Jon viadomy jak muzyka, majstar pa vyrabie huślaŭ i ŭdzielnik hurta «Stary Olsa».
Aleś skončyŭ Biełaruski dziaržaŭny ŭniviersitet infarmatyki i radyjoelektroniki, dzie atrymaŭ adukacyju inžyniera pa aŭtamatyčnym kiravańni i pierakładčyka zamiežnych moŭ. Jašče padčas vučoby jon aktyŭna ŭdzielničaŭ u kłubach aŭtarskaj pieśni ŭ BDU i Linhvistyčnym univiersitecie.
Z 2002 hoda Čumakoŭ hraŭ i śpiavaŭ u hurcie siaredniaviečnaj muzyki «Stary Olsa», vykarystoŭvajučy huśli, žalejki i inšyja staražytnyja instrumienty. U 2005 hodzie jon zasnavaŭ hurt «Kielich koła», jaki vykonvaŭ biełaruskija narodnyja tancy pad dudu i huśli, adnak prajekt praisnavaŭ niadoŭha. Čas ad času muzyka vystupaŭ solna z tancavalnaj narodnaj prahramaj.
Akramia taho, Aleś pierakładaŭ irłandskuju hieraičnuju paeziju na biełaruskuju movu. U hurcie Ceilidh Ceol, stvoranym u siaredzinie 2000-ch, jon vykonvaŭ staradaŭnija irłandskija pieśni pa-biełarusku, pryśviečanyja svabodzie i pamiaci prodkaŭ. Choć hurt spyniŭ vystupy ŭ 2018 hodzie, Čumakoŭ praciahvaŭ śpiavać hetyja pieśni samastojna.
U 2020 hodzie jaho vakał prahučaŭ u biełaruskaj ahučcy sieryjała «Viadźmar» ad Netflix — jon vykanaŭ viadomuju pieśniu Toss A Coin To Your Witcher u biełaruskim pierakładzie.
Z pačatku XXI stahodździa Aleś Čumakoŭ taksama zajmajecca vyvučeńniem historyi huślaŭ i ich vyrabam. Častku instrumientaŭ jon stvaryŭ pad kiraŭnictvam majstra Źmitra Sasnoŭskaha.