Vychodzić «Avatar: Połymia i popieł». Ci jon ździvić hledačoŭ?

Chit kaladnaha kinasiezonu — novy film «Avatar: Połymia i popieł» (Avatar: Fire and Ashes). Ci varta iści pa kvitki na trochhadzinny błakbastar?

Fota: kadr z trejlera

Najbujniejšy kinaatrakcyjon apošnich hadoŭ viartajecca. U suśvietnym prakacie novy «Avatar», i niama sumnievaŭ, što jon źbiare natoŭpy i ŭ biełaruskich kinateatrach.

U centry historyi, jak zaŭždy, Džejk Sali — ziamlanin, jaki niekali pryniaŭ abličča na'vi, žycharoŭ płaniety Pandora. Za hady, jakija minuli z prybyćcia na płanietu, Sali abzavioŭsia tam siamjoj i zaadno ŭziaŭ da siabie Spajdera, syna jaho voraha pałkoŭnika Kuoryča.

«Avatar: Połymia i popieł» raspačynajecca sumna. Starejšy syn Džejka zahinuŭ, a žonka ziamlanina, Niejciry, jašče i vostryć zub na Spajdera — maŭlaŭ, čužyniec. Ale žyćcio dakazvaje joj, što vorahaŭ treba šukać nie ŭ siamji. Na śled Džejka vychodzić toj samy Kuoryč, hałoŭny antahanist usioj franšyzy, jaki śpić i bačyć, jak by schapić Džejka i sudzić jaho za pierachod na bok prychadniaŭ (chacia prychadni tut akurat ziamlanie). 

A ŭ dapamohu sabie Kuoryč biare plemia Manhkvan — šerych humanoidaŭ. Kiruje tym plemieniem viadźmarka Varanh, syhranaja Unaj Čaplin (toj samy Čarli Čaplin — jejny dziadula). Niejkim čynam u Čaplin atrymałasia hierainia, jakaja zusim nie pasuje da ŭłasnaha plemieni. U adroźnieńnie ad ich Varanh chacia i lichadziejka, ale pry hetym jarkaja i źniešnie, i znutry, cikavaja istota, jakaja pahadžajecca na drennyja ŭčynki, kab zabiaśpiečyć dabrabyt ułasnaha plemieni, i ŭ pracesie pačynaje atrymlivać ad ich kajf.

Fota: kadr z trejlera

Novy «Avatar» vyjšaŭ praz try hady paśla sikveła pieršaj historyi, i zdymali jaho razam z druhoj častkaj. Hladačy, jakija pamiatajuć «Avatar: Šlach vady», znojdzie šmat padabienstvaŭ. Z adnaho boku, heta plus, tamu što «Połymia i popieł» zrobleny na tym ža vysačeznym techničnym uzroŭni, jak i raniejšyja «Avatary», asabliva jak druhaja stužka. Treci «Avatar» varta hladzieć u kinateatry, kab acanić chvalonuju kampjutarnuju hrafiku — jak i raniej, jana zachaplaje.

Na žal, pra siužet nielha skazać toje ž samaje. Druhi «Avatar» byŭ stužkaj pra toje, jak Kuoryč i ziamlanie zmahajucca suprać Sali i kłana mietkajina, da jakoha jon dałučyŭsia. Treci «Avatar» pa sutnaści źjaŭlajecca stužkaj pra toje ž samaje. Nie čakajcie vaŭ-efiekta ad novych hierojaŭ — Una Čaplin, jakoj by jarkaj ni była, nie vyciahvaje na siabie try hadziny hetaha dziejstva. Dyj nijakich revalucyjnych śpiecefiektaŭ tut niama. Zrešty, ich nie było i try hady tamu.

Scenar «Połymia i popiełu» na hałavu słabiejšy za techničnuju častku i pierapoŭnieny niepatrebnymi ŭskładnieńniami. Stužka vyhladaje nieapraŭdana zaciahnutaj — hetuju historyju možna było b raskazać i za dźvie hadziny.

Viadoma, ludzi iduć na «Avatar» nie dziela pryhožych dyjałohaŭ. U vypadku z franšyzaj Džejmsa Kemierana hladač idzie pa ŭnikalny dośvied śpiecefiektaŭ, da jakich u śviecie pakul jašče nichto nie nabliziŭsia. I ŭsia franšyza, u tym liku «Połymia i popieł» — heta sapraŭdy pryhoža.

Fota: kadr z trejlera

Ale ŭ toj ža čas vyhladaje, što pryhožaja pacyfisckaja kazka pieratvarajecca vyklučna ŭ instrumient dla zarablańnia hrošaj, za jakim bolš niama dušy. Rabić heta «Połymiu i popiełu» budzie nie tak prosta, bo krytyki nie ŭ zachapleńni ad prajekta. Viadoma, jany addajuć naležnaje techničnaj častcy, ale pišuć pry hetym, što ŭ «Połymi i popiełu» sapraŭdnaha ahniu za scenarom nie adčuvajecca, a siužet zdolny stamić.

Niama sumnievaŭ, adnak, što ścižma fanataŭ «Avatara» znoŭ zabiaśpiečyć stužcy šalonyja zbory. Astatnim hledačam zastajecca spadziavacca, što Kemieran, jak abiacaŭ, pieraklučycca na sahu pra Terminatara.

Kamientary da artykuła