Tramp: Zialenskamu treba być realistam, va Ukrainie adbyvajecca maštabnaja karupcyja, čas pravodzić vybary

Prezident ZŠA znoŭ vykazaŭsia nakont vybaraŭ prezidenta va Ukrainie, a taksama nakont vajny i nieparazumieńniaŭ ź jeŭrapiejskimi lidarami. 

Fota: Anna Moneymaker / Getty Images

Na pytańnie žurnalista pra toje, što mienavita mieŭ na ŭvazie prezident ZŠA ŭ aŭtorak, kali skazaŭ, što Zialenskamu treba pačać prymać peŭnyja rečy, Tramp adkazaŭ, što prezidentu Ukrainy treba być realistam, piša VVS.

«Ja dumaju, jamu treba być realistam. I mianie sapraŭdy cikavić, kolki času projdzie da vybaraŭ. Tak, heta demakratyja. Heta doŭha. U ich daŭno nie było vybaraŭ. Jany stračvajuć šmat ludziej.

I, mahčyma, ludzi, viedajecie, kali pahladzieć na apytańni, ja b skazaŭ, 82% nasielnictva patrabujuć urehulavańnia. Ukrainski narod choča bačyć urehulavańnie», — skazaŭ Tramp.

Prezident ZŠA taksama dadaŭ, što va Ukrainie «adbyvajecca maštabnaja karupcyja».

«Ja nikoha nie krytykuju, ale tam sapraŭdy adbyvajecca maštabnaja karupcyja. I jany pytajucca: kali ž, ludzi zadajuć hetaje pytańnie, kali adbuducca vybary? Źbirajucca jany pravodzić vybary ci prosta buduć praciahvać u tym ža duchu? Tamu ja dumaju, što para spynić hetuju vajnu. I ja dumaju, što hetu vajnu možna ŭładzić, ale dla tanha patrebnyja dvoje», — skazaŭ amierykanski prezident.

Taksama Donald Tramp namiaknuŭ na razychodžańni ź jeŭrapiejskimi lidarami nakont Ukrainy, zajaviŭšy, što novyja sustrečy mohuć stać marnavańniem času — paśla taho, jak Kijeŭ, z paviedamleńniaŭ ŚMI, pieradaŭ Vašynhtonu svaje apošnija prapanovy ab spynieńni vajny.

«Dumaju, u nas byli nievialikija razychodžańni nakont niekatorych ludziej, i my pahladzim, čym heta skončycca. I my skazali, što pierad sustrečaj chočam daviedacca peŭnyja rečy. Jany chacieli b, kab my praviali sustreču ŭ Jeŭropie na hetych vychodnych. I my prymiem rašeńnie ŭ zaležnaści ad taho, što jany pradstaviać.

My nie chočam marnavać čas. Paroju treba dazvolić ludziam samim raźbiracca, a paroju — nie. Ale prablema ŭ tym, što, dazvalajučy ludziam samim raźbiracca, vy stračvajecie tysiačy ludziej na tydzień. Heta absurdna», — cytuje Trampa ahienctva Reuters.

Ź jahonych słoŭ, jon razmaŭlaŭ ź lidarami Francyi, Hiermanii i Vialikabrytanii nakont Ukrainy «ŭ davoli rezkich vyrazach».

Tramp dadaŭ, što jeŭrapiejskija lidary chočuć na vychodnych pravieści sustreču ŭ Jeŭropie z udziełam Zialenskaha i ZŠA, ale jon prymie pastanovu pra svoj udzieł tolki paśla atrymańnia ad ich «adkazaŭ».

Ukraina pieradała ZŠA adkaz na «mirny płan»

«Ukraina ŭ sieradu pradstaviła administracyi Trampa svoj adkaz na apošni prajekt mirnaha płana ZŠA, paviedamili mnie ŭkrainskija i amierykanskija čynoŭniki», — napisaŭ u Ch karespandent Axios Barak Ravid.

Raniej pra pieradaču Kijevam Złučanym Štatam abnoŭlenaha varyjantu «mirnaha płana» paviedamlała ahienctva Bloomberg.

Aficyjna Kijeŭ pakul nie paćviardžaŭ pieradaču dapracavanaha dakumienta Vašynhtonu.

Kamientary da artykuła