«Zarablajcie, a nie vajujcie». Tramp i Uitkaf vierać, što Pucin moža pajści na mir dziela prybytkaŭ. Abo sami marać ab zysku

Vydańnie The Wall Street Journal raskazvaje, jak kamanda Donalda Trampa pavieryła idei «miru praź biźnies», jakuju prapanavaŭ Kreml.

Donald Tramp i jahony śpiecpradstaŭnik Styŭ Uitkaf. Fota: The White House

Jak pišuć aŭtary materyjału, kab zrazumieć historyju pieramoŭ administracyi z Rasijaj, jany parazmaŭlali ź dziasiatkami čynoŭnikaŭ, dypłamataŭ, byłych i dziejnych supracoŭnikaŭ raźviedki z ZŠA, Rasii i Jeŭropy, a taksama z amierykanskimi łabistami i inviestarami, blizkimi da administracyi. Karcina, jakaja ŭźnikaje pierad žurnalistami, ujaŭlaje saboj historyju pra toje, jak biźnies-lidary pracavali ŭ abychod tradycyjnych dypłamatyčnych schiem, sprabujučy spynić vajnu, prapanujučy Rasii patencyjna pryvabnyja biźnies-schiemy.

«Miežy značać mienš za biźnies»

Dla Kramla pieramovy ŭ Majami stali kulminacyjaj stratehii, raspracavanaj jašče da inaŭhuracyi Trampa: abyści tradycyjny aparat nacyjanalnaj biaśpieki ZŠA i pierakanać administracyju hladzieć na Rasiju nie jak na vajennuju pahrozu, a jak na krainu biaźmiežnych ekanamičnych mahčymaściaŭ.

Rasija spakušała Vašynhton pierśpiektyvaj viarnuć svaju ekanomiku abjomam u 2 tryljony dołaraŭ na suśvietny rynak, pryčym amierykanski biznes pavinien byŭ atrymać dyvidendy raniej za jeŭrapiejskich kankurentaŭ.

Hetaja prapanova idealna supała ź fiłasofijaj Trampa i jaho davieranych asob — śpiecpasłańnika Styva Uitkafa i ziacia Džareda Kušniera.

Jak adznačajuć aŭtary, jany całkam padzialajuć padychod Trampa da hieapalityki: miežy majuć mienšaje značeńnie, čym biznes. Uitkaf u kamientary dla Wall Street Journal rastłumačyŭ svajo bačańnie tak: kali Rasija, Ukraina i ZŠA stanuć biznes-partniorami i ŭsie buduć kvitnieć, heta stanie naturalnaj abaronaj ad budučych kanfliktaŭ.

Pavodle WSJ, hałoŭny pieramoŭščyk Pucina Kirył Dźmitryjeŭ prapanoŭvaŭ vykarystać 300 miljardaŭ dołaraŭ zamarožanych na Zachadzie rasijskich aktyvaŭ dla sumiesnych inviestycyj i adnaŭleńnia Ukrainy pad ehidaj ZŠA. Jon prapanoŭvaŭ taksama sumiesnuju raspracoŭku karysnych vykapniaŭ u Arktycy i navat abjadnańnie namahańniaŭ u kosmasie — až da sumiesnaj misii na Mars z udziełam SpaceX Iłona Maska.

Vydańnie źviartaje ŭvahu na toje, što dla mnohich u Biełym domie Trampa razmyvańnie miežaŭ pamiž biźniesam i hieapalitykaj źjaŭlajecca nie niedachopam, a asablivaściu. Klučavyja daradcy prezidenta bačać mahčymaść dla amierykanskich inviestaraŭ zaklučyć prybytkovyja ździełki ŭ novaj paślavajennaj Rasii i stać kamiercyjnymi harantami miru.

U razmovach z Uitkafam i Kušnieram Rasija vyrazna namiakaje, što addaść pieravahu amierykanskamu biznesu, a nie kankurentam ź jeŭrapiejskich dziaržaŭ, lidary jakich «zašmat krytykujuć».

Jak skazaŭ adzin z hetych ludziej: «Heta ŭ styli «mastactva ździełki» Trampa — skazać: «Hladzicie, ja vyrašaju hetuju prablemu, i ŭ hetym jość vielizarnyja ekanamičnyja vyhady dla Amieryki».

«Hość z Maskvy»

Realizacyja płana pačałasia amal adrazu paśla ŭstupleńnia Styva Uitkafa na pasadu śpiecpradstaŭnika prezidenta. Jaho ofis źviarnuŭsia ŭ Ministerstva finansaŭ ZŠA z prośbaj dazvolić vizit u Vašynhton Kiryła Dźmitryjeva — kiraŭnika Rasijskaha fondu pramych inviestycyj, jaki znachodziŭsia pad sankcyjami. Jak śćviardžajuć krynicy vydańnia, Tramp asabista ŭchvaliŭ hetuju ryzyku dziela spynieńnia vajny.

2 krasavika Dźmitryjeŭ prybyŭ u Bieły dom sa śpisam šmatmiljardnych biźnies-prajektaŭ. Choć dziaržsakratar Marka Rubia pastaviŭsia da ŭsiaho hetaha skieptyčna, sam Dźmitryjeŭ pakinuŭ Vašynhton z upeŭnienaściu, što «inviestycyjny davier možna transfarmavać u palityku». 

Kirył Dźmitryjeŭ i Styŭ Uitkaf. Fota: Vyacheslav Prokofyev, Sputnik, Kremlin Pool. Photo via AP, File

U adkaz Uitkaf pačaŭ rehularna naviedvać Rasiju. Užo ŭ kancy krasavika jon sustreŭsia z Pucinym u Sankt-Pieciarburhu, dzie rabiŭ natatki, karystajučysia pasłuhami kramloŭskaha pierakładčyka.

Pry hetym, jak piša WSJ, jon ihnaravaŭ kaardynacyju ź jeŭrapiejcami: prapuściŭ sustreču ŭ Łondanie i admoviŭsia vykarystoŭvać liniju śpiecsuviazi, spasłaŭšysia na ščylny hrafik pajezdak. Tym časam Dźmitryjeŭ i Uitkaf rehularna razmaŭlali pa telefonie, abmiarkoŭvajučy ŭsio bolš ambicyjnyja prapanovy.

Dzialba abiacanaha piraha

Pakul išli pieramovy, amierykanski vialiki biznes zaniaŭ startavyja pazicyi ŭ čakańniach mirnaj damovy. Exxon Mobil praviała tajemnuju sustreču z kiraŭnikom «Rasnafty» Iharam Siečynym u Dosie, abmiarkoŭvajučy viartańnie ŭ prajekt «Sachalin». Rasijskija aliharchi Cimčanka i braty Rotenbierhi prapanoŭvali amierykancam radoviščy hazu i vykapniaŭ.

Ludzi z atačeńnia Trampa taksama šukali vyhadu: siabar Trampa-małodšaha Džentry Bič vioŭ pieramovy ab kupli doli ŭ «Novatek» pry ŭmovie źniaćcia sankcyj, a donar Styvien Linč naniaŭ łabistaŭ za 600 tysiač dołaraŭ dla atrymańnia licenzii na kuplu «Paŭnočnaha patoku — 2». Sprava dajšła navat da kosmasu: u lipieni kiraŭnik «Raskosmasa» naviedaŭ centr NASA i zavody Boeing sa SpaceX.

Ale niama dokazaŭ taho, što Uitkaf, Bieły dom ci Kušnier infarmavanyja pra hetyja namahańni abo kaardynujuć ich. Čałaviek, znajomy z dumkami Uitkafa, skazaŭ, što pasłańnik upeŭnieny: luboje ŭrehulavańnie z Rasijaj pryniasie karyść Amierycy ŭ cełym, a nie tolki žmieńcy inviestaraŭ.

Padziei paskorylisia ŭ žniŭni. 6 žniŭnia Uitkaf znoŭ prylacieŭ u Maskvu. Padčas prahułki pa parku «Zaradździe» i nastupnaj sustrečy ŭ Kramli Pucin zrabiŭ niezvyčajny žest: pieradaŭ praz Uitkafa saviecki miedal «Orden Lenina» dla syna namieśnika dyrektara CRU, jaki zahinuŭ va Ukrainie, vajujučy na baku rasijskich vojskaŭ.

Prezident Rasii Uładzimir Pucin sustrakajecca sa śpiecyjalnym pradstaŭnikom prezidenta ZŠA Styvam Uitkafam u Maskvie, 6 žniŭnia 2025 hoda. Fota: Kremlin Press Office / Handout / Anadolu via Getty Images

Na nastupny dzień Uitkaf pravioŭ videakanfierencyju ź jeŭrapiejskimi lidarami, ahučyŭšy prapanovu Pucina: Rasija nibyta hatovaja admovicca ad pretenzij na Zaparožskuju i Chiersonskuju vobłaści, kali Ukraina zdaść reštu Danieckaj vobłaści. Jeŭrapiejcy byli źbityja z pantałyku i navat nie adrazu zrazumieli, ci idzie havorka pra realny vyvad vojskaŭ, ci prosta pra zamarozku linii frontu.

Dypłamatyja sieparatnaja, u abychod CRU

Asablivuju tryvohu, jak adznačajuć aŭtary, vyklikała toje, što Uitkaf zvyčajna dziejničaŭ sieparatna ad prafiesijnych dypłamataŭ i raźviedčykaŭ. WSJ piša, što CRU nie było ŭ poŭnaj miery prainfarmavana pra pieramovy nakont abmienu pałonnymi. Bolš za toje, aficyjny śpiecpasłańnik pa Ukrainie hienierał Kit Kiełah byŭ faktyčna adchileny ad realnych pieramoŭ, što paźniej pryviało da jaho zajavy ab adstaŭcy.

Situacyja ź infarmavańniem była nastolki krytyčnaj, što čynoŭniki z adździeła pa kantroli za sankcyjami ŭ Minfinie ZŠA časam daviedvalisia padrabiaznaści sustreč Uitkafa z Maskvoj ad svaich brytanskich kaleh, a nie ad ułasnaha kiraŭnictva.

Sapraŭdny šok vyklikała ŭciečka infarmacyi ŭ Jeŭropie. Praź niekalki dzion paśla sustrečy Pucina i Trampa na Alascy adna ź jeŭrapiejskich słužbaŭ raźviedki raspaŭsiudziła spravazdaču siarod čynoŭnikaŭ pa nacbiaśpiecy, jakija byli šakavanyja jaho źmiestam. Unutry byli padrabiaznaści kamiercyjnych i ekanamičnych płanaŭ, jakija administracyja Tramp abmiarkoŭvała z Rasijaj, uklučajučy supolnuju zdabyču redkaziamielnych mietałaŭ u Arktycy.

Pravał damoŭlenaściej

Jak adznačaje vydańnie, sproba zamacavać damoŭlenaści na samicie 15 žniŭnia z udziełam Trampa, Rubia, Uitkafa i Pucina pravaliłasia amal imhnienna. Zamiest abmierkavańnia ździełak Pucin pačaŭ čytać lekcyju pra «1000‑hadovuju historyju adzinstva narodaŭ». U vyniku abied i pracoŭnyja siesii byli admienienyja. Uitkaf pakinuŭ sustreču ŭ prastracyi, chacia i sprabavaŭ zachavać pazityŭny nastroj.

Donald Tramp sustrakaje Uładzimira Pucina na Alascy, 15 žniŭnia 2025 hoda. Fota: AP Photo / Julia Demaree Nikhinson

Finalnym akordam hetaj historyi, jaki demanstruje pryjarytet ekanomiki nad vajnoj, staŭ vizit Uładzimira Zialenskaha ŭ Vašynhton u kastryčniku. Ukrainski prezident prasiŭ dalnabojnyja rakiety Tomahawk dla ŭdaraŭ pa rasijskich NPZ, kab pieramovy z Maskvoj mahli vieścisia z pazicyi siły.

Adnak, pa danych WSJ, Tramp pierahavaryŭ z Pucinym jašče napiaredadni i vyrašyŭ admović Kijevu ŭ zbroi. Zamiest vajennaha rašeńnia Uitkaf prapanavaŭ ukraincam kamiercyjnuju alternatyvu: paprasić u Trampa 10‑hadovaje vyzvaleńnie ad mytaŭ. Na jaho ścipłuju dumku, heta dało b mahutny šturšok ukrainskaj ekanomicy.

Tłumačačy svaju pazicyju žurnalistam u Majami Uitkaf adznačyŭ:

«Ja zajmajusia biznesam pa ŭrehulavańni ździełak. Voś čamu ja tut. My praciahvajem hrukacca ŭ dźviery i prapanoŭvać idei».

Jeŭrapiejskija ž sajuźniki zastalisia z vysnovaj, jakuju sfarmulavaŭ premjer-ministr Polščy Donald Tusk: «Heta nie pra mir. Heta pra biznes».

Kamientary da artykuła