U płanie Trampa pa Ukrainie z 28 punktaŭ zastałosia 19

Płan ZŠA pa spynieńni vajny pamiž Rasijaj i Ukrainaj byŭ istotna skaročany padčas pieramovaŭ u Ženievie — zamiest 28 punktaŭ u im zastałosia 19, paviedamlaje Financial Times.

Donald Tramp. Fota: Chip Somodevilla / Getty Images

Pavodle infarmacyi vydańnia, niekatoryja patrabavańni vydalili abo źmianili paśla taho, jak Ukraina i jeŭrapiejskija krainy nazvali ich nieprymalnymi.

Kijeŭ nahadaŭ pra svaje «čyrvonyja linii» — nijakich abmiežavańniaŭ dla ŭłasnaj armii i nijakich terytaryjalnych sastupak, u tym liku admovy ad Danbasa. Jeŭrapiejskija sajuźniki padtrymali hetyja pazicyi i adznačyli, što pytańni zamarožanych rasijskich aktyvaŭ i sankcyj zastajucca ŭ kampietencyi ES.

Pradstaŭnik Ofisa prezidenta Ukrainy Alaksandr Bieŭz paćvierdziŭ, što pieršapačatkovaha 28‑punktnaha płana ŭžo niama: častku punktaŭ prybrali, častku — pierapracavali. Pry hetym usie zaŭvahi Kijeva byli ŭličanyja.

U Biełym domie zajavili, što 23 listapada ZŠA i Ukraina padrychtavali «abnoŭlenuju i ŭdakładnienuju» viersiju płana, jaki pavinien zabiaśpiečyć suvierenitet Ukrainy i spraviadlivy dy tryvały mir.

Dziaržsakratar ZŠA Marka Rubia adznačyŭ «vialiki prahres», choć dakumient jašče patrabuje dapracoŭki. Kančatkovuju viersiju pavinny zaćvierdzić Donald Tramp i Uładzimir Zialenski, paśla čaho jana budzie pieradadziena Maskvie.

Tramp u svajoj sietcy Truth Social napisaŭ, što, mahčyma, «źjaviŭsia praśviet» u spravie pieramovaŭ, ale zaklikaŭ nie radavacca daterminova. Raniej jon patrabavaŭ, kab Ukraina pryniała płan da 27 listapada, ale paśla zajaviŭ, što dakumient nie źjaŭlajecca «finalnaj prapanovaj».

U Jeŭropie čakajuć praciahu pieramovaŭ na nastupnym tydni pry ŭdziele Francyi, Hiermanii, Vialikabrytanii, a taksama, mahčyma, Polščy, Finlandyi i hiensieka NATA Marka Rute. Niekatoryja jeŭrapiejskija dypłamaty pryznajuć, što rychtujucca i da scenaryja, kali Tramp moža całkam admovicca ad padtrymki Ukrainy.

Prezident Finlandyi Alaksandr Stub paśla razmovy z prezidentam Ukrainy Uładzimiram Zialenskim nazvaŭ ženieŭskija pieramovy «krokam napierad», ale padkreśliŭ, što šerah važnych pytańniaŭ pa-raniejšamu nie vyrašany. Jon dadaŭ, što ŭsie aśpiekty, jakija tyčaccca ES abo NATA, buduć abmiarkoŭvacca asobnymi farmatami.

Adnačasova pres-sakratar Kramla Dźmitryj Piaskoŭ zajaviŭ, što Rasija nie atrymlivała ad ZŠA aficyjnych paviedamleńniaŭ pra hetyja pieramovy i sustrečy pradstaŭnikoŭ dźviuch krain na hetym tydni nie płanujucca.

Kamientary da artykuła