Što ciapier znachodzicca na miescy kliniki «Novy zrok» u Minsku?

Miedycynski centr «Novy zrok» u 2023 hodzie trapiŭ pad katok represij — ułady pazbavili jaho licenzii, a paźniej zasnavalniku Alehu Kaŭryhinu zavočna prysudzili 12 hadoŭ kałonii.

Budynak «Novaha zroku» na Kłumava, 5a ŭ Minsku. Fota: «Jandeks Karty»

Paśla zakryćcia pamiaškańni sietki klinik u roznych haradach byli vystaŭlenyja na aŭkcyjony. 

Jak stała viadoma, pa adrasie Kłumava, 5a ŭ Minsku, u budynku, dzie raniej była klinika «Novy zrok», adkryłasia dziaržaŭnaje dziciačaje aftalmałahičnaje kansultatyŭna-dyjahnastyčnaje adździaleńnie mikrachirurhii — častka 10‑j haradskoj kliničnaj balnicy. Adździaleńnie dziejničaje z 24 studzienia 2025 hoda. 

Kalektyŭ novaha adździaleńnia 10‑j balnicy. Na zadnim fonie bačnyja nadpisy, što byli na šklanych dźviarach i ścienach kliniki «Novy zrok». Fota: 10gkb.by

Budynak «Novaha zroku» na Kłumava, 5a ŭ Minsku. Fota: «Jandeks Karty»

«Što tyčycca kliniki ŭ Minsku, to ŭžo atrymany dakumient, što ŭ studzieni niejki sud adbyŭsia (zasnavalnika na jaho nie zaprasili). Było pryniata rašeńnie faktyčna adabrać budynak. Potym pryjšła papiera, što dakumienty novaha ŭłaśnika nakiravanyja ŭ sud. Chto hety ŭłaśnik, my nie viedajem», — raskazvaŭ u krasaviku 2025 hoda Aleh Kaŭryhin u intervju «Lusterku».

Raniej paviedamlałasia, što na aŭkcyjonie taksama pradali pamiaškańnie kliniki ŭ Mahilovie (praśpiekt Mira, 6−8, płošča 389 kvadratnych mietraŭ). Jaho kupili za 771 tysiaču rubloŭ, ale novy ŭłaśnik nieviadomy.

U čym sutnaść spravy sietki klinik «Novy zrok»?

U 2023 hoda Kamitet dziaržkantrolu ŭziaŭsia za miedcentr «Novy zrok». Paviedamlałasia, što DFR vyjaviŭ u sietcy klinik schiemu vypłaty zarobkaŭ u kanviertach: bolš jak 50 rabotnikaŭ nibyta atrymali zvyš 2,5 miljona rubloŭ mima buchhałteryi. Asnoŭnym fihurantam nazvali zasnavalnika sietki Aleha Kaŭryhina, jaki daŭno žyŭ za miažoj. U dačynieńni jaho i niekalkich supracoŭnikaŭ zaviali spravu ab uchileńni ad apłaty padatkaŭ.

27 lipienia 2023‑ha Minzdaroŭja pazbaviła sietku licenzii, spasłaŭšysia na parušeńni ŭ dakumientach. Usie abvinavačańni Aleh Kaŭryhin nazvaŭ nadumanymi i zajaviŭ pra vymušany vychad ź biełaruskaha rynku, paśla čaho kliniki zakryli, a piersanał zvolnili.

U 2024 hodzie Kaŭryhin atrymaŭ zavočny prysud — 12 hadoŭ kałonii i bujny štraf. Akramia padatkovych abvinavačańniaŭ, jamu inkryminavali i šerah palityčnych artykułaŭ — sadziejničańnie ekstremisckaj dziejnaści, raspalvańnie sacyjalnaj varožaści i zakliki da sankcyj. Jon nazyvaje spravu palityčna matyvavanaj.

Kamientary da artykuła