Pa spravie Softkłuba trasuć taksama VTB i Pryjor
Možna mierkavać, što kiraŭnika banka VTB Uładzimira Lichadzijeŭskaha zatrymlivali, ale ŭžo adpuścili.
Staršynia praŭleńnia banka VTB Uładzimir Lichadzijeŭski. Fota: Bank VTB
Raniej «Naša Niva» paviedamlała, što 23 kastryčnika 2025 hoda pačalisia zatrymańni pa spravie Softkłuba — u siłavikoŭ uźnikli pretenzii da viadučaha IT-pravajdara bankaŭskich rašeńniaŭ u Biełarusi. U hety dzień byŭ zatrymany hienieralny dyrektar i stvaralnik kampanii Uładzimir Sirotka.
Čytajcie taksama: Sprava Softkłuba: zatrymany patryjarch biełaruskaha IT Uładzimir Sirotka i niekalki top-mieniedžaraŭ. Jany padaryli nam ARIP
Praz try dni, 26 kastryčnika, siłaviki pryjšli da staršyni praŭleńnia Ceptar Banka Alaksandra Ihnatava.
Jak paviedamlajuć «Našaj Nivie» surazmoŭcy z bankaŭskich kołaŭ, taksama byli zatrymańni ŭ Pryjorbanku i ŭ banku VTB (Biełaruś).
Tak, nazyvajecca proźvišča staršyni praŭleńnia VTB Uładzimira Lichadzijeŭskaha. Paćvierdzić infarmacyju ab zatrymańni mienavita Lichadzijeŭskaha z druhoj krynicy nie atrymałasia, ale bankir trymaje miesiendžary na svaim rasijskim numary (jon doŭha žyŭ i pracavaŭ u Rasii), i apošni anłajn jahonaha akaŭnta ŭ vajbiery — 29 kastryčnika. Heta prykładna supadaje ź inšymi zatrymańniami pa hetaj spravie. Taksama možna zrabić vysnovu, što ŭ jaho kanfiskavanaja technika.
Ilustracyjny zdymak. Fota: bank VTB
Bank VTB (Biełaruś) z 2022 hoda znachodzicca pad amierykanskimi sankcyjami, Uładzimir Lichadzijeŭski ŭznačalvaje bank z pačatku 2024-ha.
U Pryjorbanku zatrymańni nie zakranuli praŭleńnia banka.