Aryna Sabalenka raskazała, kali źbirajecca naradzić i na što tracić pryzavyja

«U 18 hadoŭ ja dumała: «Značyć tak, da 25 hadoŭ ja vyjhraju ŭsio, što chaču. U 25 hadoŭ naradžu, viarnusia i praciahnu pieramahać».

Aryna Sabalenka. Fota: Robert Prange / Getty Images

Pieršaja rakietka śvietu Aryna Sabalenka ŭvachodzić u dziasiatku samych vysokaapłatnych tenisistak. Za svaju karjeru jana zarabiła $42 miljony pryzavych.

«Hrošy — heta, viadoma, pryjemny bonus va ŭsioj hetaj historyi, ale nie było takoha, što ja hulaju matč: «Dyk voś tam ža stolki hrošaj za vyjhryš!» Nikoli. Ja prosta chaču ŭnieści svajo proźvišča ŭ historyju. (…) Hrošy — bonus dobry. Pytańnie, jak ty imi karystaješsia», — 

kaža Sabalenka ŭ intervju błohieru Alaksandru Sakałoŭskamu.

Sabalenka całkam finansuje svaju kamandu, jakaja składajecca z vaśmi-dzieviaci čałaviek (uklučajučy trenieraŭ, sparynh-partniora, fitnes-treniera i fizijaterapieŭta). Praŭda, jana nie nazyvała ličbaŭ, zaŭvažyŭšy, što «starajecca pra heta nie dumać».

Pa słovach spartsmienki, jana imkniecca zabiaśpiečyć dla ŭdzielnikaŭ svajoj kamandy maksimalny kamfort u raźjezdach. Usie finansavyja pytańni jana delehuje mieniedžaru.

«Ja nie chaču, kab maja kamanda žyła ŭ jakoj-niebudź nie zusim zrazumiełaj haścinicy. Chaču, kab usie byli ŭ kamforcie, kab my ŭsie išli da adnoj mety ŭ maralna dobrym stanie. (…) Ja da hetaha staŭlusia jak da inviestycyi ŭ naš pośpiech».

Sabalenka pryznałasia, što ŭdzielniki jaje kamandy vykarystoŭvajuć jaje hrošy dla taho, kab rabić staŭki na sport.

Ciažki vybar: siamja ci sport

Sabalenka pryznałasia, što tema siamji i dziaciej źjaŭlajecca dla jaje balučaj, bo pastajanna vyklikaje pytańni ŭ rodnych. U junym uzroście jana mieła dakładna akreśleny termin dla dekretnaha adpačynku:

«U 18 hadoŭ ja dumała: «Značyć tak, da 25 hadoŭ ja vyjhraju ŭsio, što ja chaču. U 25 hadoŭ naradžu, viarnusia i praciahnu vyjhravać». Nadyšło 25, ja vyjhrała štości, ale padumała, što, napeŭna, hadoŭ u 27—28 naradžu. Voś mnie zaraz 27, ja dumaju, što paźniej, pieraniasiom».

Ciapier, pa słovach tenisistki, jana aryjentujecca na toje, kab adkłaści płanavańnie siamji prykładna na piać hadoŭ, kab całkam realizavacca jak spartsmienka.

«Ja prosta chaču realizavacca pa maksimumie ŭ svaim sporcie, pahladzieć, jak daloka ja mahu zajści. Heta taki aryjencirovačny płan — chaciełasia b hadoŭ praź piać pasprabavać zavieści siamju i, mahčyma, pasprabavać viarnucca. Znoŭ-taki, u zaležnaści ad taho, na jakoj stadyi ja budu ŭ svaim žyćci. (…)

Heta ciažki taki momant, tamu što ja, kali b mahła, užo zaraz pajšła b [u dekret]. Ja vielmi lublu dziaciej, i byccam by dzieci lubiać mianie, i ja b vielmi chacieła, ale zaraz u mianie ŭ pryjarytecie maja karjera», — adznačyła Sabalenka.

Kamientary da artykuła