Na Uschodnich mohiłkach adkryli nadmahilny pomnik Źmitraku Biadulu

3 listapada na Uschodnich mohiłkach, jak i było zapłanavana, adkryli pomnik viadomamu biełaruskamu piśmieńniku Źmitraku Biadulu, paviedamiła BiełTA.

Źmitrok Biadula (sapraŭdnaje imia i proźvišča Samuił Płaŭnik) pamior u 1941 hodzie padčas vajennaj evakuacyi kala horada Uralsk u Kazachstanie, dzie jaho i pachavali. U 2020 hodzie prach piśmieńnika viarnuli na radzimu i pierapachavali ŭ Minsku.

Tady ž Dziaržaŭny muziej historyi biełaruskaj litaratury abviaściŭ zbor srodkaŭ i konkurs siarod biełaruskich skulptaraŭ na stvareńnie pomnika. Pieramohu atrymaŭ prajekt Siarhieja Humileŭskaha.

Pavodle słoŭ aŭtara, u asnovu kampazicyi pakładzieny vobraz kałasoŭ, što chistajucca na vietry. Forma pomnika niaroŭnaja, złamana-płastyčnaja — jana simvalizuje niaprosty los biełaruskich litarataraŭ taho času i šlach samoha Biaduli.

Na adkryćci prysutničaŭ i syn piśmieńnika Jafim Płaŭnik. Jon adznačyŭ, što pomnik zrobleny z hustam i adpaviadaje miescu: 

«Jon taki, jaki pavinien stajać na mohiłkach. Biez usialakich praźmiernaściaŭ. Jon ścipły i adnačasova vieličny».

Jak paviedamiła namieśnica dyrektara pa navukovaj rabocie Dziaržaŭnaha muzieja historyi biełaruskaj litaratury Alesia Kuźniacova, padčas konkursu kamisii doŭha daviałosia vyznačać, jakim pavinien być pomnik. Skulptaram pakazvali materyjały i fotazdymki z muziejnych archivaŭ.

Kuźniacova padkreśliła, što Źmitrok Biadula — adzin z najvažniejšych biełaruskich tvorcaŭ XX stahodździa, udzielnik stanaŭleńnia nacyjanalnaj litaratury i druku. Jana spadziajecca, što adkryćcio pomnika zacikavić ludziej i natchnić ich znoŭ źviarnucca da jaho tvoraŭ.

Kamientary da artykuła